Delawie: Viti 2018, vit u suksesit në dialogun Kosovë-Serbi

“Viti 2018 do të jetë vit i suksesit në dialog!” Kështu shprehet Ambasadori i Shteteve të Bashkuara në Kosovë, Greg Delawie përmes rrjetit social Twitter duke shfaqur një optimizëm për rezultatet konkrete nga dialogu përfundimtar Kosovë-Serbi, me ndërmjetësim të Bashkimit Evropian.

Ambasadori amerikan thekson se pret progres nga dialogu në mes palës kosovare dhe asaj serbe, që pritet të nis këtë të diele në Bruksel, ndërkohë ka shpërndarë gjithashtu një twitter të Drejtores për Ballkanin Perëndimor në Shërbimin e Veprimit të Jashtëm Evropian të Bashkimit Evropian, Angelina Eichhorst, rreth dialogut Kosovë-Serbi.

“Përfaqësuesja e Lartë e BE-së, Federica Mogherini, presidentët Aleksandar Vuçiç dhe Hashim Thaçi, do të vazhdojnë punën e tyre në fazën gjithëpërfshirëse të normalizimit në dialogun Beograd-Prishtinë, do të vlerësojnë marrëveshjet ekzistuese, do të informojnë për arritjet e deritashme, do të diskutojnë për hapat e ardhshëm në periudhën e ardhshme intensive”, ka shkruar Eichhorst.

Ndryshe gjatë ditës së djeshme presidenti Hashim Thaçi ka bërë të ditur lajmin se do të udhëtojë drejtë Brukselit me ftesë të Përfaqësueses së Lartë të BE-së, Federica Mogherini ku do të zhvillojë takim me presidentin e Serbisë, Aleksandar Vuçiç.