Demokratët Evropianë kritikojnë Von der Leyen për heshtjen ndaj Serbisë

Demokratët Evropianë kanë reaguar pas fjalimit të Presidentes së Komisionit Evropian, Ursula von der Leyen, duke e akuzuar atë për heshtje ndaj gjendjes alarmante në Serbi.

Përmes rrjetit social X, Demokratët Evropianë theksojnë se heshtja e saj nuk duket si kujdes diplomatik, por më shumë si siklet, pasi familja e saj politike, Partia Popullore Evropiane, EPP, ende e ka pjesë të saj partinë e presidentit serb Aleksandar Vuçiç, SNS.

“Është kjo bashkëpërgjegjësi, indiferencë apo frikë nga pakëndshmëria? Cilado qoftë arsyeja, Komisioni Evropian nuk mund të kthejë shpinën kur demokracia është në rrezik,” thuhet në reagimin e Demokratëve Evropianë duke përfunduar:

“Evropa duhet të flasë me guxim: demokracia nuk mund të anashkalohet për rehati partiake.”