Dëmtoi kartmonedhën/ Ambasada e SHBA reagoi ndaj Daçiçit

Ambasada e SHBA në Beograd reagoi pasi ministri i Jashtëm i Serbisë, Ivica Daçiç, iu bashkua një fushate në internet, duke shkruar në kartmonedhën 100-dollarëshe me alfabet cirilik “Kosova është Serbi”.

“Në vend se të shkatërrojë kartmonedhën me imazhin e shkencëtarit të madh amerikan dhe burrështetasit, Benjamin Franklin, ministri Daçiç do të mund të mendonte ndoshta për thënien e tij: ‘Ji në luftë me veset tuaja, e në paqe me fqinjët”, thuhet në përgjigjen e Ambasadës së SHBA-së në Beograd për RFE.

Presidenti i Kosovës, Hashim Thaçi, tha se fushata, në të cilën ka marrë pjesë edhe zyrtari i lartë serb, është denigruese për vetë serbët.

Daçiç, në një deklaratë për gazetën serbe “Blic”, e arsyetoi qasjen e tij, duke thënë:

“Kjo është politika jonë shtetërore, këtë e them vazhdimisht dhe pse mos ta shkruaj.”

Paratë, tha ai, nuk ishin të tijat dhe se qasja e tij nuk ka lidhje me Shtetet e Bashkuara.

Sipas mediave serbe, Daçiç tha se fjalët “Kosova është Serbi” do t’i shkruante në kartmonedhën e secilit vend që e thotë të kundërtën.

Në mbrojtje të ministrit Daçiç u shpreh udhëheqja e Partisë Socialiste të Serbisë, e cila kryesohet nga Daçiç.

“Mbi shefin e diplomacisë serbe, Ivica Daçiç, bëhet presion i madh, me kërcënime të hapura për vdekje”, tha Vlladan Zagragjanin, zyrtar i Partisë Socialiste të Serbisë.

Sipas nënkryetarit të Qendrës joqeveritare për Politikë të Jashtme në Serbi, Dragan Gjukanoviç, fakti që Daçiç i është bashkuar fushatës në internet nuk ka asnjë efekt diplomatik.

“…ndërsa sa i përket nivelit simbolik, nuk shoh se cili është mesazhi dhe pse shkruhet në kartmonedha. Në anën tjetër, nuk mendoj se kjo do ta ndryshojë gjendjen në terren”, tha Gjukanoviç.

Si ka nisur kjo?

Në deklaratën e kryeministres së Serbisë, Ana Brnabiç, e cila, duke folur për udhëheqësit e Kosovës, tha se ka punë me “njerëz që kanë dalë prej malit”, qytetarët e Kosovës reaguan me një fushatë në internet, duke postuar fotografi me hashtag-un #LiterallyJustEmergedFromTheWoods, që do të thotë “të sapodalë nga mali”.

Disa ditë më vonë, pronari i kafenesë në Beograd “Pavle Korçagin”, Vojin Cuciç, iu bëri thirrje ndjekësve në mediat sociale që në kartmonedhat e dollarit dhe euros të shkruajnë “Kosova është Serbi” dhe fotografitë e tyre t’i shpërndajnë online.

“Sikur secili serb të shkruante vetëm një kartmonedhë, kjo do të ishte fushatë e mrekullueshme”, thuhet në një nga postimet në Instagram të kësaj kafeneje.

Aksioni u zhvillua me mbishkrime edhe në kartmonedhat e Australisë, Danimarkës, Arabisë Saudite, Britanisë së Madhe dhe disa vendeve të tjera.

Fushata mori vëmendje më të madhe pasi asaj iu bashkua ministri serb, Daçiç.

Disa qytetarë të Kosovës u kundërpërgjigjën, duke postuar në mediat sociale kartmonedha me mbishkrimin “Kosova është Kosovë”. Në mesin e këtyre kartmonedhave u vërejt edhe dinari serb.

A është shkelje shkrimi në kartmonedha?

Dëmtimi i një monedhe, sipas ligjit në Shtetet e Bashkuara, është shkelje që dënohet me gjobë financiare ose burgim deri në gjashtë muaj, por vetëm nëse dëmtimi “bëhet me qëllim që letrat me vlerë të bëhen të papërshtatshme për përdorim”.

Nga kjo rrjedh se rregulloret amerikane nuk e ndalojnë shkruarjen e mesazheve në kartmonedha, përveç nëse ato dëmtohen aq shumë saqë nuk mund të përdoren.

Në Serbi, shkruarja në kartmonedha nuk është kundërvajtje, por kartmonedhat e dëmtuara konsiderohen të papërshtatshme për qarkullim.