Dendias në Prishtinë: Greqia mbështet liberalizimin e vizave për Kosovën!
Ministri grek i Punëve të Jashtme, Nikos Dendias, pas takimit në Prishtinë me homologen kosovare tha se Greqia mbështet liberalizimin e vizave për Kosovën pasi kriteret janë përmbushur ndërsa Donika Gërvalla i kujtoi se Greqia nuk e njeh pavarësinë e Kosovës.
“Ne besojmë që Ballkani Perëndimor duhet të jetë pjesë e Bashkimit Evropian, ne jemi poashtu pro-liberalizimit të vizave për juve sepse ju keni përmbushur kriteret. Ne jemi këtu që të ju ndihmojmë edhe në fushën e sundimit të ligjit,” tha shefi i diplomacisë greke Dendias ndërsa përfundoi:
“Është e qartë se ne mbështesim fuqishëm vazhdimin e dialogut Kosovë-Serbi, që mes palëve të arrihet një marrëveshje ligjërisht e obligueshme.”
Ndërkohë Ministrja e Punëve të Jashtme e Kosovës, Donika Gërvalla, tha se me Greqinë dhe me partnerët tjerë të Bashkimit Europian do të vazhdojmë intenzivisht dialogun rreth njohjes së pavarësisë së vendit tonë.
“Njohjen dhe respektimin e pavarësisë së vendit tonë nga të gjithë anëtarët e Bashkimit Evropian përfshirë edhe Greqinë e konsiderojmë si një kontribut thelbësor për stabilitetin në Ballkan. Pavarësia e Kosovës është fakt i patjetërsueshëm dhe sa më parë që të pranohet një fakt i tillë aq më shpejt sigurohet një perspektivë e qëndrueshme për rajonin. Por, duke pasur parasysh faktin se Greqia pavarësinë e Kosovës e sheh ende nga një këndëvështrim tjetër ne riafirmojmë se me Greqinë dhe me partnerët tjerë të BE-së do të vazhdojmë intenzivisht dialogun edhe rreth kësaj çështje.”
Ndryshe, Ministri i Punëve të Jashtme të Greqisë, Nikos Dendias, sot ka takuar në Prishtinë edhe Presidenten e Kosovës, Vjosa Osmani, Kryetarin e Parlamentit, Glauk Konjufca dhe Kryeministrin, Albin Kurti.
