Dënohet për shpifje, reagon Boçi: Është vendim i Edi Ramës, i cili…

Gjykata e Tiranës ka vendosur sot të dënojë me 70 mijë lekë gjobë, Ish-deputetin e PD-së, Luçiano Boçi, i cili është paditur nga Ish-ministrja e Arsimit, Lindita Nikolla.

Gjykata e ka shpallur sot fajtor Boçin për veprat shpifje dhe fyerje, duke e dënuar atë me 50 mijë lekë për secilën nga këto vepra penale. Me bashkimin e dënimit, ish-deputeti i PD-së, do t’i paguaj si dëmshpërblim, ish-ministres së Arsimit, një total prej 70 mije lekësh.

Këtë vendim, Ish-deputeti i PD, Luçiano Boçi e ka vlerësuar si vendim politik i cili vjen nga një gjyqtar që nuk e ka kaluar vettingun politik të organizatës bazë të Partisë që përzgjedh besnikët.

“Është i vetë Ramës, i cili trysnon sot dhe imponon shumë vendime në raport me kundërshtarët e tij politikë dhe në raport me aleatët e tij kriminalë. Sot në Shqipëri dënohesh shumë lehtë e shpejtë pse denoncon, pse thua të vërteta, pse proteston, pse kërkon të drejta,” thekson Ish-deputeti i PD, Luçiano Boçi në reagimin e tij duke shtuar se po të bësh krim, korrupsion, trafik droge, pastrim parash të pista, vrasje nuk të gjen gjë as nga policia as nga Rama, as nga drejtësia “e re” e kapur prej tij. Madje venerohesh e gradohesh.

Reagimi i plotë

Nuk jam i surprizuar nga vendimi i gjyqtarit sot. Ishte nje vendim i shkruar para se të merrej e lexohej. I shkreti, akoma nuk e ka kaluar vettingun politik të organizatës bazë të Partisë që përzgjedh besnikët.

Si i tillë, ishte një vendim i pastër politik.  Jetojmë ditët e regjimit të narko-politikës dhe kuptohet. Dënohesh për Agjitacion-Propagandë të bërë kundër udhëheqjes dhe nuk është çudi. Aq më tepër Vendimi nuk ka qenë tek e fundit, i tij.

Është i vetë Ramës, i cili trysnon sot dhe imponon shumë vendime në raport me kundërshtarët e tij politikë dhe në raport me aleatët e tij kriminalë. Sot në Shqipëri dënohesh shumë lehtë e shpejtë pse denoncon, pse thua të vërteta, pse proteston, pse kërkon të drejta.

Po të bësh krim, korrupsion, trafik droge, pastrim parash të pista, vrasje nuk të gjen gjë as nga policia as nga Rama, as nga drejtësia “e re” e kapur prej tij. Madje venerohesh e gradohesh.

Ne sollëm të gjitha argumentat e duhura e bindëse për çdo lexues ligji e jo më për një specialist.

Vendimin do ta apelojmë. Deri atëhere, Lindita mund të shkojë të krihet nja dy herë tek parrukieri, se një e krehur aq i bën, sa gjysma e dënimit, me shpresë se do i bëjnë telefon e trysni dhe Apelit.

Sa për deklarimet e mia i them dhe njëherë botërisht, me pak ndryshim. Ish Ministrja e arsimit me mesataren 5.8, nuk është thjeshtë e paaftë. Është super e paaftë. Ish Ministrja e shkatërrimit të Arsimit, nuk është thjeshtë e papërgjegjshme. Është super e papërgjegjshme. Nuk është e korruptuar, por super e korruptuar.

Këtë ia dëshmuan 140 mijë studentë më protestën e tyre, që i rrethuan ministrinë një muaj rresht dhe e shkulën nga karrigia. Ia thanë prindërit e Shqipërisë që morën me vonesë dëftesat e 340 mijë fëmijëve të tyre. Ia thonë çdo ditë 34 mijë mësuesit që janë mashtruar disa herë rresht nga deklarimet e saj.

Padrejtësia që sundon sot, zhbëhet duke rrëzuar juntën e vjedhësit Ramë të votave, të shpresës e së ardhmes!