Denoncimi, Berisha: Edi Rama bleu vota duke përdorur pagesat për personat me aftësi ndryshe!

Duke denoncuar farsën më çnjerëzore dhe më cinike zgjedhore në historinë e vendit, zgjedhjet e 11 majit 2025. Kryetari i Partisë Demokratike, Sali Berisha, akuzoi Kryeministrin Edi Rama për përdorimin e pensionistëve dhe personave me aftësi ndryshe si mjet për blerje votash, nëpërmjet shpërblimeve monetare të shpërndara gjatë fushatës.

“Edi Rama përdori dhuratën 100 euro për pensionistë, për 760 mijë pensionistë, për të ndikuar për votën.

Ai ka përdorur pagesat për personat me aftësi ndryshe në kulmin e fushatës elektorale për të blerë vota. Ka shpërndarë për 164 mijë persona me aftësi ndryshe, dhe për mijëra e mijëra kujdestarë të tyre që në total shkojnë rreth 200 mijë, ka shpërndarë si shpërblim  4 mijë lekë apo 40 euro,” tha Sali Berisha duke theksuar se solli këto shembuj për të ilustruar cinizmin ekstrem dhe pashpirtësinë e narkoqeverisë.

Dhe, në vend se të ishte ndjekur politika e rritjes së pensioneve, e vendosjes së minimumit jetik, thekson Kryetari i Partisë Demokratike, ndiqet praktika e shpërblimit për votë si për pensionistët, ashtu edhe për 200 mijë persona me aftësi të kufizuar dhe kujdestarët e tyre, ndërsa përfundon:

“Dënoj dhe njëherë me forcën më të madhe këtë farsë të shëmtuar zgjedhore dhe deklaroj se PD kurrë nuk do të njohë, nuk do ta pranojë.

Do bëjë gjithçka që shqiptarët të votojnë si qytetarë të lirë.”

Deklaratë:

Farsa elektorale 11 maj 2025 kishte aspektet më çnjerëzore, më cinike.

Edi Rama përdori dhuratën 100 euro për pensionistë, për 760 mijë pensionistë, për të ndikuar për votën në një kohë kur unë kam sjellë këtu një statistikë të Eurostatit.

Dhe kjo statistikë e Eurostatit tregon se pensionistët shqiptarë në të gjithë Europën janë ata që paguhen më pak se të gjithë të tjerët.

Janë ata, të cilët në vlerë nominale mujore paguhen 50 përqind më pak se sa vendi i parafundit, se sa Turqia.

Kurse në fuqi blerëse të monedhës, ata janë pothuajse tre herë nën Turqinë.

Janë rreth dy herë nën Bosnjen dhe janë mbi dy herë gjer në 6.5 herë nën pensionistët e tjerë.

Pra në qoftë se me fuqi blerëse, nuk po them se me kështu janë 20-30 herë, por po marr fuqinë blerëse se ky është tregues më real, me fuqi blerëse, pensionisti shqiptar është rreth 7 herë nën një pensionist evropian.

U ndala te ky grafik për dy arsye.

Për të dënuar politikën çnjerëzore që ndiqet ndaj pensionistëve, një politikë e cila bazohet kryekëput për shkak të vjedhjes dhe korrupsionit qeveritar.

Mos harroni se këta 760 mijë pensionistë, që siç e shihni në fuqi blerëse marrin 2 deri në 2.5 herë më pak se dy vendet e parafundit, marrin shumë më pak se minimumi jetik i premtuar, i cili do ishte 1.6, por do ishte 2.4, më shumë se sa është sot dhe natyrisht 100 eurot e dhuruara kanë pasur efekt jashtëzakonisht të këta njerëz që marrin një mesatare në muaj prej 133 eurosh.

Po të kemi parasysh çmimet, të cilat janë 117 përqind, pra 17 përqind më të larta se mesatarja e BE, i bie që hendeku midis pensionistit shqiptar dhe pensionistit evropian me mesatare pension të jetë edhe shumë herë më i madh.

Por, pse unë u ndala te kjo?

Sepse krimi elektoral i Edi Ramës nuk ka të ndalur.

Ai ka përdorur pagesat për personat me aftësi ndryshe në kulmin e fushatës elektorale për të blerë vota.

Ka shpërndarë për 164 mijë persona me aftësi ndryshe, dhe për mijëra e mijëra kujdestarë të tyre që në total shkojnë rreth 200 mijë, ka shpërndarë si shpërblim  4 mijë lekë apo 40 euro.

Një vendim, të cilin e kanë marrë në dhjetor, por e kanë zbatuar pikërisht atëherë kur nuk mund të zbatohej, e kanë zbatuar në fushatën elektorale.

Solla këto shembuj për të ilustruar cinizmin ekstrem dhe pashpirtësinë e narkoqeverisë, e cila ndonëse i lë në kushte më të mjera, ju e patë, pensioni në Shqipëri është 60 përqind më i ulët se sa në vendin me pensionin më të ulët në Europë.

Dhe në vend se të ishte ndjekur politika e rritjes së pensioneve, e vendosjes së minimumit jetik, ndiqet praktika e shpërblimit për votë si për pensionistët, ashtu edhe për 200 mijë persona me aftësi të kufizuar dhe kujdestarët e tyre.

Dënoj dhe njëherë me forcën më të madhe këtë farsë të shëmtuar zgjedhore dhe deklaroj se PD kurrë nuk do të njohë, nuk do ta pranojë.

Do bëjë gjithçka që shqiptarët të votojnë si qytetarë të lirë.

Faleminderit!