Denoncimi/ Mbi 420 mijë nxënës nuk mund të marrin dëftesat, KLSH e prokuroria të hetojnë

Mbi 420 mijë nxënës në mbarë vendin nuk mund të marrin dëftesat, pasi Ministria e Arsimit ka dështuar në bërjen e tenderit prej 70 milionë lekësh.

Partia Demokratike ka denoncuar sot çështjen, e cila ka shkaktuar ankth te prindërit dhe nxënësit që nuk mund të ndjekin dot studimet e mesme jashtë vendit apo të transferohen brenda vendit.

Deputeti Luçiano Boçi i ka bërë thirrje ministres së Arsimit, Lindita Nikolla, të ndërpresë pushimet, ndërsa KLSH  dhe Prokuroria të hetojnë korrupsionin e saj.

“Pranë PD dhe Komisionit të Edukimit dhe Mediave, kanë ardhur ankesa nga prindër që ngrenë shqetësimin se fëmijët e tyre nuk mund të pajisen dot me dëftesat e arsimit parauniversitar.

Të vetmet dëftesa që u printuan dhe u shpërndanë ishin ato të klasës së nëntë, por edhe ato rezultuan me gabime, ç’ka e bën dëftesën dokument të pavlefshëm për 35 mijë nxënës.

Një pjesë e tyre rrezikojnë të mos regjistrohen në shkolla të mesme brenda dhe jashtë vendit.

PD dënon heshtjen e Ministrisë së Arsimit. Papërgjegjshmëria, paaftësia dhe korrupsioni i ministres Lindita Nikolla ka shënuar një rekord të ri.

Rreth 420 mijë nxënës shqiptarë për herë të parë në historinë e shkollës shqiptare janë pa dëftesa shkollore.

Sipas informacioneve të ardhura në PD, tenderi  i dëftesave është zvarritur për shkak të pazareve të prishura të ministres së Arsimit. Në lojë janë 70 milionë lekë të reja,  për të cilat Nikolla nuk ka gjetur pazarin e duhur, duke dënuar rreth 420 mijë nxënës me mosmarrjen e dëftesës.

Shumë prindër që kërkojnë të transferojnë fëmijët në shkolla brenda dhe jashtë vendit mbetën peng të një procedure që duhej të kishte përfunduar dy muaj më parë.

Nikolla të ndërpresë menjëherë pushimet e fundjavës dhe të zgjidhë problemin e qindra mijëra nxënësve. Kjo është një aferë për të cilën KLSH dhe Prokuroria kanë se çfarë të zbulojnë”, tha Boçi.