Depardieu si Arafati!
nga Agim Popoci
Pas takimit me Kryeministrin e ardhshëm të Kosovës, Albin Kurti, Kryeministri Edi Rama bëri të ditur se në një bashkëbisedim të gjatë prej disa orësh me Albinin hapën shumë tema të bashkëpunimit dhe mirëkoordinimit të dy qeverive. Foto zyrtare e takimit Rama-Kurti të cilën e publikoi Edi Rama ishte, siç tha ai, në një moment pushimi të veçantë që patën, me autorët kosovarë dhe aktorin e madh Gerard Depardieu, të cilët po xhirojnë në Shqipëri filmin “Unë dhe Millosheviçi”.
Pse Albini nuk është Hashimi kjo e pengon shumë sot Edi Ramën, por pse e përdhos një takim kaq të rëndësishëm Kryeministri i Shqipërisë me foton e përbashkët me “aktorin e madh” që si pa dashje është mik i Vladimir Putinit , kjo nuk është rastësi, dhe ndodhë që nga dita e parë kur këmba komuniste serbe shkeli në Tiranë. Dhe, në këtë pikë duhet të jetë i kujdesshëm Albin Kurti!
“Ç’kuptim ka dhe ç’ka bërë direkt ose indirekt, për Luftën Nacional Çlirimtare Shqiptare, Tito (biri më i lavidshëm i popujve të Jugosllavisë), si dhe kuptimi i sotëm në rindërtimin dhe mbrojtjen e indipendencës shqiptare” ishte editoriali i titulluar i kriminelit Enver Hoxha, pas “Traktatit mbi koordinimin e planeve ekonomike dhe bashkimit doganor dhe barazimin e monedhave” të firmosur në Beograd më 27 Nëntor të vitit 1946, e që sot është pagëzuar “Shengeni Ballkanik”, në përpjekje për ta bindur popullin shqiptar që ndonëse nuk jemi me origjinë sllave, thekson diktatori, kemi afinitete të mëdha me sllavët e Jugut. Madje, sipas Enver Hoxhës, gjaku i njerëzve të Shqipërisë dhe Jugosllavisë na u paska përzier në luftën kundër të njejtëve armiq. Dhe, kështu, në vitin 1946 Enver Hoxha konstaton:
“Këto hallka të shëndosha që lidhnin të dy popujt t’onë nuk mund ti këpuste as shpata e shtypësve t’anë, as intrigat e imperialistëve, as vjershat e poetit të imperializmit dhe agjentit italian, shovinistit At Gjergj Fishtës!”
Shqiptarët me këtë rast patën fat dhe fal horoskopit të Stalinit, ky Traktat u bë nul, Enver Hoxha mbeti pa e bashkuar Shqipërinë me Jugosllavinë, por hallkën e shëndoshë me serbët e ruajti duke i bërë sallatë shqiptarët e Kosovës dhe trashëgimtarët patriotë të At Gjergj Fishtës.
Me rënien e regjimit të këtij shqiptaro me gjak të përzier serbi në luftëra, politika e tij kriminale kundër Kosovës kishte krijuar shqiptarin e ri që mendon ndryshe në Tiranë. Kjo u reflektua dhe reflektohet edhe me “rënien e komunizmit”!
Në vizitën e tij të parë si President i Kosovës, Ibrahim Rugova, u përballë në Tiranë me një situatë të ngjashme si Albin Kurti, vetëm se ai që duhej të ishte pjesë e fotos zyrtare, ishte miku i Jacques Chirak.
Darkës së punës së dy presidentëve, “papritmas” i bashkohet lideri i Palestinës, Mohammed Yasser Abdel Rahman Abdel Raouf Arafat al-Qudëa al-Husseini.
Dr.Rugova mbeti i habitur, nuk e pranoi prezencën e tij në tavolinë, i ktheu kurrizin, vazhdoi me darkën dhe fotoja zyrtare mbeti pa u realizuar përkundër insistimit të Presidentit të Republikës. Në atë kohë nuk kishte rrjete sociale, por mediat ngelën pa foton e Presidentit të Republikës me dy presidentët e “shteteve me të njëjtat halle”, siç u tha, në arsyetimin pse ishte ftuar miku i Presidentit Chirak, arsyetim ky që ishte i papranueshëm për Ibrahim Rugovën!
Të njejtën gjë bëri dhe Edi Rama mbrëmë! Pas mospërfilljes që i bëri Albin Kurtit që në hyrje të Kryeministrisë, ku më shumë sajdisen rilindasit e portalit të keqqeverisjes, që çdo javë i fton për spektaklin e ERTV, e deri tek përfundimi i takimit, ku të gjithë po e prisnin një njoftim shpresëdhënës për të ardhmen e qeverisë së re të Kosovës, me një mbështetje ndryshe nga Qeveria e Shqipërisë.
Por, JO! Pas një bashkëbisedimi të gjatë prej disa orësh me Albinin, ku hapën shumë tema të bashkëpunimit dhe mirëkoordinimit të dy qeverive, asnjë fjalë tjetër për takimin. Dhe, Edi Rama foton zyrtare që ka nga ky takim, na servir në rrjetet sociale me mikun e Vladimir Putinit, karagjozin Gerard Depardieu, që as sot nuk dihet pse do të jetë më shumë malazez, rus dhe serb, se sa francez që është.
Po, Albin Kurti nuk është Ibrahim Rugova, dhe kjo nuk mund ti sugjerohet, ndryshe do të sëmuret me kancer! Por Kryeministri i ardhshëm i Kosovës duhet të jetë i kujdesshëm jo vetëm pse përballë ka një njeri që vazhdon e mburret për përzierjen e gjakut me sllavët e Jugut, por më e pakta që Edi Rama mund ti bëjë Kosovës është “Shengeni Ballkanik” dhe ky nuk ka pse bëhet protagonist i kësaj çmendurie.
Sot Kryeministri i ardhshëm i Kosovës, Albin Kurti, tha se Edi Rama është kundër shkëmbimit të territoreve. Po, edhe kjo është e vërtetë sepse si ai ashtu si dhe Enver Hoxha nuk e kanë çuar kurrë nëpër mend shkëmbimin.
Bashkimi me Serbinë ishte dhe është opsioni i vetëm, si i Traktatit ashtu dhe “Shengenit Ballkanik”, për të cilin, si Albin Kurti ashtu dhe shqiptarët ende nuk e kanë një informacion të qartë se për çfarë projekti bëhet fjalë, dhe çfarë kanë në kokë, Aleksandar Vuçiç dhe Edi Rama!
Dhe, sot, radhët e Lëvizjes Vetëvendosje në Tiranë nuk po shtohen pse Albin Kurti e shpiku politikën kombëtare por se shqiptarët u bindën që ky njeri nuk punon për Serbinë. Për këtë lloj lideri kishin nevojë shqiptarët dhe jo për Edi Ramën, të cilit, i dhanë votën, dhe ai u ulë në prehrin e Aleksandar Vuçiçit. Erdhi Dita!
