Deputetët braktisin Lulzim Bashën, Berisha: PD, më e bashkuar dhe më e hapur se kurrë!

Duke ju bërë thirrje deputetëve që po braktisin masivisht Lulzim Bashën, që të bashkohen me opozitën e vërtetë, lideri historik i demokratëve, Sali Berisha, tha se në politikë secili ka kontributin dhe investimin e tij, askush nuk ka të drejtë t’i mohojë tjetrit vendimin për t’u rikthyer te investimi që ka bërë në vite dhe me këto parime ecën PD: Më e bashkuar, më e fortë dhe më e hapur se kurrë.

“Zgjedhjet e 6 marsit treguan në dritën e diellit para shqiptarëve se ‘Shtëpia e lirisë’ ku PD ka rolin kryesor, përbën opozitën e vërtetë shqiptare. Më 6 mars, 70 për qind e popullit opozitar votoi për ‘Shtëpinë e lirisë’, pra për Partinë e vërtetë Demokratike.

Qytetarët shqiptarë i dhanë përgjigje të merituar Edi Ramës. I treguan se nuk pranojnë lojën me peng-opozitën. Natyrisht unë gjej këtu rastin të ftoj çdo demokrat që të lexojë mesazhin e datës 6 mars dhe të bashkohemi si opozitë e vërtetë për të ecur drejt fitores së sigurt në zgjedhjet e ardhshme,” tha Sali Berisha duke konstatuar se gara është e hapur dhe PD është në një proces të reformimit total.

“Të rikthimit në çdo vendimmarrje të saj të votës së lirë. Kushdo që është i gatshëm të kontribuojë në këtë proces dhe ka besim te vota e lirë, është plotësisht i mirëpritur. Nëse më pyet mua a jep dorëheqjen Lulzim Brava, mund të them se ai është një peng që nuk e ka në dorë veten e tij. Ai po keqpërdoret dhe keqshfrytëzohet deri në fund sa të mos mbetet më asgjë nga ai. Mendoj se zoti Brava ka injoruar veten e tij dhe është injoruar nga elektorati shqiptar. Le ta lëmë në fatin e tij.

Zgjedhjet e 6 marsit u zhvilluan në kushtet më të jashtëzakonshme se kurrë nuk ka ndodhur që një autokrat, një narkokryetar qeverie, që të rrëmbejë logon dhe t’ia japë kallp opozitës. Kalimi i logos te kallp-opozita ishte një dekurajim i madh për qytetarët që të dalin në votime. Nuk them se fajin e kanë skeptikët. Unë u shpreh nderimin më të madh atyre që votuan më 6 mars, por shpreh edhe respekt e mirëkuptim për ata që qëndruan në skepticizmin e tyre. Më 7 mars, preokupimi i parë i imi ka qenë se si të punojmë që këta opozitarë t’i bindim të na votojnë në zgjedhjet e radhës,” tha Berisha ndërkohë për situatën e krijuar në PD-në që vazhdon e drejtohet nga Lulzim Basha pas dorëheqjes së dy Nënkryetarëve, Agron Gjekmarkaj dhe Grida Duma, dhe nëse është i gatshëm ti amnistoj, lideri historik shprehet:

“Kam ndjekur zhvillimet brenda selisë së Lul Bravës dhe bunkerit të blinduar. Vlerësoj dhe përshëndes qëndrimet e deputetëve të PD, të cilët sapo konstatuan me fakte nga qëndrimi i elektoratit shqiptar, se Brava-opozita nuk është një opozitë, por është false, shprehën qëndrimet e tyre të drejta. Unë i ftoj ata të bashkohen me elektoratin e tyre. Të bashkohen me PD, të kontribuojnë në konsolidimin e saj. I garantoj plotësisht se ligji i pandryshueshëm i këtij bashkimi është dhe mbetet vota e lirë,” tha Berisha.

“Në politikë, jashtë teorisë së gabimit nuk del askush, por e rëndësishme është që mbi bazë zhvillimesh, faktesh dhe dokumentesh që të korrigjosh gabimet dhe qëndrimet. Zgjedhjet nuk ishin më një debat brendapartiak, nuk ishin më një votim brendapartiak. Zgjedhjet ishin në nivel elektoral. Kështu që çdo deputet ka jo të drejtën, por ka detyrën themelore të lexojë mesazhin e zgjedhësve dhe të marrë vendimin që i takon. Së dyti, shtoj se në politikë secili ka kontributin dhe investimin e tij. Askush nuk ka të drejtë t’i mohojë tjetrit vendimin për t’u rikthyer te investimi që ka bërë në vite. Me këto parime ecën PD: Më e bashkuar, më e fortë dhe më e hapur se kurrë”.

Për Kongresin e pajtimit, i cili u lakua aq shumë pas rezultateve që dolën nga zgjedhjet e pjesshme vendore të 6 Marsit, Berisha ka një përgjigje që sot është e pranueshme për çdo njeri normal përveç se Lulzim Bashës: 

“Jam i gatshëm për çdo propozim që vendos në epiqendër votën e lirë. Mund të them se dëgjon debate dhe analistë që flasin për çdo gjë, por jo për votën. U them shqiptarëve se gjithçka ka ndodhur në kundërshtim me interesat e tyre këto vite, bllokimi i integrimit, largimi masiv i shqiptarëve nga Shqipëria, rritja e varfërisë ekstreme, rritja e varfërisë në tërësi, rritja e çmimeve dhe mosrritja e rrogave, kanë një emërues të përbashkët: dhunimin e votës së tyre.

Në fund, lideri historik i Partisë Demokratike, Sali Berisha, bëri të ditur se nesër do të mblidhet Komisioni i Rithemelimit ku do të bëhet bilanci dhe do të merret vendimi në lidhje me Kuvendin e 22 marsit.

“Nesër do mblidhet Komisioni i Rithemelimit për të analizuar procesin zgjedhor dhe për të marrë vendime për datën 22 mars. Nuk mund ta fsheh për ju se gjatë këtyre javëve, të gjitha forcat e organit drejtues të PD, por edhe të rretheve kanë qenë të përqendruara në këtë fushatë elektorale në kushtet më të pabarabarta. Do bëhet një bilanc se në cilin stad është ecuria në degët e tjera, pasi në këto 6 degë procesi u ndërpre dhe do merret vendimi.” 

Ndryshe, pas reaultatit të zgjedhjeve të 6 Marsit, Agron Gjekmarkaj, dha dorëheqje nga posti i Nënrkyetarit ndërsa sot dha dorëheqje edhe Nënkryetarja Grida Duma.

“Fakti që Lulzim Basha nuk largohet edhe pasi  shumica e grupit parlamentar i kërkoi dorëheqjen na kërkon të gjithëve vendimmarrje për shpëtimin e demokratëve të sakrifikuar një dekadë. Megjithëse personalisht nuk kam asnjë përgjegjësi në vendimmarrje dhe ia kam shkruar e lënë të dokumentuara vendimet e dëmshme sot deklaroj që  jap dorëheqjen si Nënkryetare e Partisë Demokratike, duke qenë ky vetëm një prej vendimeve të domosdoshme për demokratët,” thekson Grida Duke duke përfunduar se Partia Demokratike nuk mund të jetë humbëse se duhet që dështaku të fitojë e përfitojë!