Deputetët e saj votuan pro shembjes së Teatrit, por PDIU mbështet artistët: Kërkon referendum…
PDIU ka kërkuar që për Teatrin Kombëtar të vendoset me një referendum. Një ditë pasi Kuvendi me votat e PS dhe dy deputetëve të PDIU-së miratoi ligjin që i hap rrugën shembjes së godinës aktuale, përmes një deklarate partia e drejtuar nga Shpëtim Idrizi thotë se është në krah të artistëve dhe kundër Edi Ramës e qeverisë së tij.
“Dje në Parlament u votua akti që i hap rrugë prishjes së Teatrit Kombëtar, një ndërtesë pasuri kulturore e shpirtërore e vendit. PDIU sot shpreh solidaritetin e saj dhe është në krah të artistëve, atyre që i dhanë kulturë, art e emocione këtij vendi.
PDIU është me Teatrin si një ndër simbolet e këtij qyteti.
Simbole të tilla në çdo vend të botës ruhen e restaurohen, po mesa duket Teatri Kombëtar u trajtua si një simbol për tu sulmuar dhe ndërkohë është një ndërtesë që kontraston me gjithë shëmtirat urbane të ndërtuara përgjatë këtyre viteve të tranzicionit …
PDIU beson se për Teatrin, e vetmja ndërtesë me shpirt e pamje në mes të Tiranës, e cila është pronë e shumë brezave dhe e qytetarëve të Tiranës do duheshin pyetur ata e jo pushteti i radhës. Për të vendosur për Teatrin do duhej të zhvillohej referendum, siç bën çdo qytet normal.
Por në vend të referendumit ata që me arrogancë i kishin vënë syrin bënë me forcën e kartonave aktin e paprecedentë e antikushtetues për miratimin e një ligji të veçantë, për të përligjur prishjen e Teatrit, e rrëmbimin e pronës publike.
Pikërisht, për ti dhënë fund vandalizmit e arrogancës së çdo pushteti përballë qytetarëve, PDIU bën thirrje të përsëritur që të ndryshojë ligji për referendumet, që do ti mundësonte qytetarëve demokracinë direkte për fatet e tyre”, thuhet në deklaratë.
