Deputetët serbë “pushtojnë” Parlamentin e Kosovës. Kërkojnë takim me Hahn

Përfaqësuesit e Listës Srpska kanë hyrë në Parlamentin e Kosovës ku do të qëndrojnë deri në ardhjen e Komisionerit për zgjerim pranë BE, Johannes Hahn.

Kryetari  i kësaj Liste, Goran Rakiç tha se pas takimit të jashtëzakonshëm të Shtabit që me urdhër të Vuçiçit u quajt Shtab i krizës në Mitrovicë, deputetët serbë kanë hyrë në ndërtesën e Kuvendit të Kosovës.

“Momentalisht jemi duke u kthyer nga takimi i shtabit të krizës dhe dëshiroj të ju njoftoj se përfaqësuesit e Listës Serbe kanë hyrë në Kuvend në Prishtinë ku do të qëndrojnë deri në ardhjen e Hahnit të cilin do ta njoftojmë me hapat anti-serbë që çojnë kah katastrofa humanitare,” tha Rakiç për televizionin publik serb, RTS, duke shtuar se deputetët serbë do të luftojnë me mjete demokratike që, siç tha ai, fëmijët tanë të kenë të drejtë në ushqim e jetë normale, raporton KTV.

Rakiç është i bindur se “i tërë populli është përkrah deputetëve serbë” dhe se i mbështesin në këtë betejë.

“Do të provojmë të jemi në linjë me përfaqësuesit tanë të cilët nuk do të dalin nga objekti i Kuvendit derisa nuk takohen me Hahnin”, tha kryetari i Listës Serbe, Goran Rakiç.

Ndryshe,  komisioner evropian për Zgjerim, Johannes Hahn, nesër do të qëndrojë në Kosovë ku pritet të takohet me zyrtarët shtetërorë për të diskutuar për taksën prej 100 për qind ndaj mallrave serbe dhe atyre të Bosnjës.