Deputeti që do Edi Rama, të fyejë dhe akuzojë opozitën
Nuk dihet se pse shkoi në Kukës, qytetarët atje e kuptuan se po vjen Kryeministri Edi Rama vetëm nga shtetrrethimi, por ndjekësit e fushatës së tij “Deputeti që duam” e kuptuan një mesazh që u lehtëson shumë punën: vetëm duhet ta shajnë dhe akuzojnë opozitën, pavarësisht nëse bëhet fjalë për politikë, pandemi, rindërtim të shtëpive të shembura nga tërmeti ose dhe një fushatë si kjo në Kukës, pa lidhje, pavarësisht se paralajmëroi një takim nga Aeroporti Ndërkombëtar i Kukësit që po merr formë!
“Edhe një vend pune që kishin, që t’i shërbenin Shqipërisë në Parlamenti, edhe atë vend pune e braktisën, sepse nuk rrinë dot me dinjitet në një vend pune. Prandaj janë rrugëve, shajnë rrugëve, shfaqen nëpër ekrane si të dehur, që kanë dalë te dera e klubit dhe nxjerrin gjithçka pa mundur më të kontrollojnë zorrët e barkut. Kjo është fatkeqësia. Paramendoni çfarë do të ndodhë, nëse iu mbetet atyre puna për rindërtimin. Dua ta kujtoj këtu se një grup jo i vogël, por i madh, familjesh, u përmbyt në Shkodër dhe u desh të vinim ne në qeveri për t’iu dhënë dëmshpërblimet,” tha Edi Rama sot, ndoshta ka thënë edhe në vitin 2013 kur ishte në opozitë, por kjo ka dalë sot nga goja e tij:
“Parafytyroni tani çfarë bëjnë këta nëse vijnë e marrin përsipër të ndërtojnë shtëpitë e njerëzve dhe pallatet, apo të përfundojnë shkollat,” i tha Edi Rama, Safet Gjicit me shokë, të cilët gojëhapur po presin 120 demokratët nga Londra kur do të vijnë të votojnë për PD, e ai vazhdoi:
“Është e thjeshtë për t’u parafytyruar, sepse nuk ka nevojë të hedhësh fall, të vrasësh mendjen, sepse bëhet fjalë për lojtarë të njohur, që i keni parë në fushë, që e kanë pasur mundësinë të luajnë. Dhe faktikisht kanë dalë të mundur përballë sfidave, përballë të gjitha sfidave. Më thoni një sfidë që ata e fituan kur ishin në fushë. Flasin sot disa, që janë ata që s’duan të shohin e dëgjojnë, që ne e paskemi krijuar varfërinë, që ne e paskemi vështirësuar ekonominë apo që paskemi hapur rrugën të largohen. E vërteta nuk është kështu.
Patjetër që shqiptarët do të largohen dhe patjetër që në këtë fazë ka më shumë që largohen, por kjo do të ndryshojë. Do të ndryshojë si në të gjitha vendet komuniste, ku largimet kanë qenë masive, dhe sot janë më pak. Nuk jemi më në bunkerin e Enver Hoxhës, ku nuk mund të lëvizte njeri,” tha Kryeministri pavarësisht se deri në momentin që po fliste, duke filluar nga mëngjesi, në këtë qytet nuk kishte të drejtë të lëvizte njeri! Ose më sakt, Kukësi ishte në shtetërrethim.
Gjithsesi kjo nuk i pengoi liderit global të vazhdoj:
“Si mund të pranojmë ne që gjithë kjo punë që kemi bërë, gjithë këto themele që kemi hedhur, të ndërpritet dhe gjërat të ktheheshin siç ishin. Ata që sot duan të kthehen, e kanë pasur dy herë mundësinë, herën e parë kur Shqipëria përfundoi në humnerë dhe shqiptarët u lanë në mëshirë të fatit, në duart e Sudes, dhe herën e dytë kur Shqipëria ishte në buzë të humnerës. Kur erdhëm ne nuk kishte lekë në buxhetin e shtetit dhe Shqipëria ishte zhytur në borxhe,” tha Rama duke i lehtësuar punën të gjithë atyre që kishte përballë dhe po e vrisnin mendjen se si mund të jetë deputeti që do kryerilindasi. Dhe, ai vazhdoi me të njejtin fjalor:
“Dëme vendit e njerëzve, siç iu kanë bërë ata, s’i kemi bërë vendit kurrë ne. Nuk e kam fjalën këtu për ata njerëzit e vrarë me plumba, se dilnin në protestë, këto janë më ekstremet, por e kam fjalën për dëmet e shkaktuara në çdo sektor, te të rinjtë, te fëmijët.”
Shtatë vjet, akuza, fyerje dhe propagandë, ofroi Edi Rama, ata që presin gjë tjetër kot e kanë, madje kot e kanë edhe me tekste shkollore:
“I kanë batërdisur me qindra tekste idiote, që janë detyruar prindërit t’ua blejnë. Sot fëmijët kanë tre tekste, tre alternativa. Jo tekste të shkruara nga këshilltarët injorantë të Saliut, por 3 tekste. Ashtu siç i kanë librat falas dhe prindërit nuk paguajnë korrupsionin dhe injorancën.”
