Deputeti suedez nominon Qeveritë e SHBA, Kosovës dhe Serbisë për Çmimin Nobel për Paqe
Qeveria e Kosovës, ajo e Shteteve të Bashkuara dhe e Serbisë janë nominuar për Çmimin Nobel për Paqe.
Nominimi është bërë nga ana e deputetit të Parlamentit të Suedisë, nga radhët e Partisë Demokristiane, Magnus Jakobson.
“Unë kam nominuar Qeverinë e SHBA-së dhe qeveritë e Kosovës dhe Serbisë për Çmimin Nobel për Paqe, për punën e tyre të përbashkët për paqen dhe zhvillimin ekonomik, përmes marrëveshjes së bashkëpunimit të nënshkruar në Shtëpinë e Bardhë. Tregtia dhe komunikimet janë aspekte të rëndësishme në ndërtimin e paqes,” tha Jakobson përmes një rrjetit social Twitter, postim të cilin e ka bërë publik edhe I dërguari i Posaçëm i Presidentit të SHBA-së për dialogun Kosovë- Serbi, Richard Grenell.
Ndryshe, më 4 shtator, kryeministri i Kosovës, Avdullah Hoti dhe presidenti i Serbisë, Aleksandar Vuçiç, në prani të presidentit të Shteteve të Bashkuara, Donald Trump, kanë nënshkruar marrëveshje për normalizim ekonomik.
Presidenti Trump e ka cilësuar si historike këtë marrëveshje.
Me këtë marreveshje, raporton RFE, Kosova ka rënë dakord që brenda një viti të mos kërkojë anëtarësim në organizata ndërkombëtare, kurse Serbia në anën tjetër, është pajtuar që brenda një viti të ndalë fushatën për çnjohjen e pavarësisë së Kosovës.
Marrëveshja parashikon realizimin e një sërë projektesh infrastrukturore dhe ekonomike mes dy vendeve.
