Deputetja “antikomuniste” e Bashës: Më i ndershëm ai që shkruante për Enverin, se ai që shkruan sot për Berishën!
Askush deri më sot nuk e ka ka kuptuar grupin “antikomunist” të deputetëve që mbështesnin Lulzim Bashën, tundnin teseren komuniste të Sali Berishës dhe i puthnin dorën Taulant Ballës, por, sot gjithçka u sqarua në Komisionin për Edukimin dhe Mjetet e Informimit Publik, ndërsa po diskutohej Projektligji “Për Ndërgjegjësimin, Kujtesën Kolektive, Ekspozimin dhe Ndëshkimin Publik të Regjimit Totalitar Komunist”, i propozuar nga ky grup deputetësh ordinerë që vazhdojnë dhe mbajnë petkun e Partisë Demokratike dhe e konsiderojnë më të ndershëm Enver Hoxhën se Sali Berishën!
“Është më e ndershme ajo që kanë bërë ata që kanë shkruar një poezi për Enverin në atë kohë, sesa ata që shkruajnë romane sot për Sali Berishën,” tha Kryetarja e këtij Komisioni, Flutura Açka, ndryshe “antikomuniste” që mbështet Lulzim Bashën, që për forcë zakoni, grupit të “mëkatarëve” që shkruajnë për Berishën i shtoi dhe ata që bëjnë libra e poezi për Edi Ramën në kohë lirie!
Gjithsesi, nga gjithë pisllëk parlamentar tashmë nuk ka më dilema pse Lulzim Basha është në opozitë, pse grupi i deputetëve që e mbështesin e pagëzuan veten kot “antikomunist”, dhe, pse ata që e konsiderojnë më preferenciale puthjen e dorës së së Taulant Ballës, tundin teseren komuniste të Sali Berishës!
Fjala e Flutura Açkës:
“Unë vetë kam shkruar fëmijë dhe për fat të mirë i kam shpëtuar faktit që s’kam botuar asnjë poezi për diktaturën. Por nuk i gjykoj kurrë kolegët e mi që në kushte të caktuara, kanë shkruar poezi dhe romane të caktuara.
Ne nuk ia kemi shpjeguar shqiptarëve që ata që kanë shkruar poezi për Enverin, janë viktima jo fajtorë. Ne i kemi futur në një kallup të gjithë dhe i kemi dënuar edhe publikisht pse ata kanë shkruar një poezi për Enverin.
Po ta kishim bërë këtë debat publik me kohë, këta njerëz nuk do të ndiheshin sot viktima dhe të intimiduar. Ne duhet ti mbrojmë ata duke u shpjeguar qasjen ashtu siç është e vërteta. Nëse nuk e bëjmë këtë gjë, do ti lëmë viktima të kohës së tyre.
Është më e ndershme ajo që kanë bërë ata që kanë shkruar një poezi për Enverin në atë kohë, sesa ata që shkruajnë romane sot për Sali Berishën dhe libra e poezi për Edi Ramën në kohë lirie. Midis të dyve, zgjedh të parët që e kanë bërë në kushte dhune sesa këta që e kanë bërë në kushte lirie. E vërteta u duhet thënë siç ka qenë.
Duke qenë dëshmitarë e kemi për detyrim që duhet ta themi të vërtetën siç ka qenë, jo për të dënuar, jo për të marrë hak por për të shpjeguar brezave që vijnë siç ka qenë e vërteta.”
