Deputetja e Bundestagut, Renata Alt: Negociatat me Serbinë duhet ngrirë menjëherë!
“Negociatat me Serbinë për anëtarësim në BE duhet ngrirë menjëherë,“ tha sot deputetja gjermane e FDP, Renata Alt duke reaguar pas qëndrimeve për pavarësinë e Kosovës të Presidentit Aleksandar Vuçiç në Parlamentin e Serbisë.
“Vuçiç po dëshmon se nuk i jep rëndësi normalizimit të përhershëm të marrëdhënieve me fqinjët, e tonet e ashpëra nga Beogradi kanë ngarkuar edhe më shumë situatën e tensionuar në mes dy shteteve,” thekson në reagimin për media, deputetja e liberalëve gjermanë, FDP, dhe kryetarja e Komisionit për të drejtat e njeriut dhe ndihmëm humanitare pranë Bundestagut, Renata Alt.
“Fakti që Vuçiç njëkohësisht forcon bashkëpunimin me Kremlinin dhe kundërshton sanskionet për Rusinë, është diametralisht kundër politikës së jashtme të BE,” shprehet Renata Alt në reagimin e saj duke përfunduar:
“Negociatat me Serbinë për anëtarësim në BE tani duhet ngrirë menjëherë!“
Ndryshe, duke folur dje para Parlamentit të Serbisë pas betimit për mandatin e dytë presidencial, raporton DW në gjuhën serbe, Aleksandar Vuçiç ndër të tjera tha:
“Çfarëdo që t’ju thonë nga Perëndimi, Kosova dhe Metohia do të jetë çështje më e madhe dhe më e rëndësishme. Ata do t’ju thonë se nuk është ashtu dhe se Kosova nuk është e ngjashme si shembujt tjerë në botë. Sa më shumë që e përsërisin, aq më shumë i mundon,“ thekson Vuçiç duke përfunduar:
“E di që këtë askush nuk dëshiron ta dëgjoj në Serbi, por duhet të jemi të gatshëm për kompromise.“
