Deputetja Kearns: Mbretëria e Bashkuar të pezullojë licencat e armëve për Serbinë!
Pas akuzave drejtuar Serbisë për trafik armësh në veri të Kosovës me ambulanca drejt Kishave Ortodokse, Kryetarja e Komisionit për Politikë të Jashtme pranë Parlamentit të Mbretërisë së Bashkuar, Alicia Kearns, sot kërkoi pezullimin e licencave të armëve me Serbinë, sapo u raportua për firmën shtetërore serbe të armëve Yugoimport se ka dërguar municion në Rusi.
“Mbretëria e Bashkuar duhet gjithashtu të pezullojë licencat e armëve për Serbinë,” tha deputetja Kearns në reagimin e saj përmes rrjetit social Twitter duke kërkuar hetime rreth eksporteve të mbrojtjes ndërsa përfundoi:
“Kam bërë thirrje për një thyerje të ngjashme disa muaj më parë pas shqetësimeve më të gjera rreth keqpërdorimit të mundshëm të eksporteve të mbrojtjes.”
Ndryshe, pas raportimit për firmën shtetërore serbe Yugoimport se po furnizon me armë Rusinë duke ndihmuar në shmangien e sanksioneve, autoritetet belge kanë vendosur të pezullojnë menjëherë licencat për Serbinë.
Ky reagim i deputetes Alicia Kearns vjen edhe pas kërcënimeve të Presidentit të Serbisë, Aleksandar Vuçiç, i cili nuk tha asgjë për priftërinjtë trafikant por e akuzoi Kryetaren e Komisionit për Politikë të Jashtme pranë Parlamentit të Mbretërisë së Bashkuar si antiserbe.
“Zonjë mos u shqetëso, ne po hetojmë kundër jush, të shohim se pse po e bëni këtë, nëse Qeveria e Britanisë së Madhe nuk reagon, ne do të detyrohemi,” kërcënoi Presidenti i Serbisë, Aleksandar Vuçiç duke shfrytëzuar një dalje publike për të kërcënuar deputeten britanike Alicia Kearns.
