Dëshirat e Edi Ramës për 2024: Nga vetëfinancimi i Portit Durrësit, Thuman-Kashar dhe katër kilometra…

Pas intervistës emocionale të Blendi Fevziut me kreun e kompanisë “Eagle Hills”, Mohamed Alabbar, dhe pas mbledhjes dyditore të qeverisë në çerdhen e afrikanëve të Melonit në Shëngjin, Kryeministri Edi Rama doli me një tufë dëshirash që i quajti prioritete për vitin 2024 dhe riorganizim të Partisë Socialiste, duke bërë të ditur se nuk ka më investitorë në rradhë që do ndërtojnë Portin e Durrësit në Porto Romano por do të jetë qeveria shqiptare që do ta financojë, meqë Albbari me shok e la Shqipërinë pa portin më të rëndësishëm të mallërave dhe njerëzve në vend.

Pas akuzave se nga Miloti nuk është ndërtuar asnjë metër rrugë për 10 vjet dhe janë turistët nga Kosova që po e vuajnë rrugëtimin e tyre deri në bregdet, Edi Rama dhe jo vetëm, nxituan të thonë se aksi Thumanë-Kashar do ndërtohet brenda këtij viti. Por, sot, Kryeministri duke e bërë të qartë se ky aks është ndërtuar vetëm 17% pas gjithë asaj lukunie propagandistike, 83% të rrugës së mbetur për ndërtim jo vetëm që nuk kanë shans të ndërtohen këtë vit, por as vitin e largët 2030 që Edi Rama mendon se do jetë në pushtet.

“Kemi kalendarizuar procesin për hapjen e garës për portin e Durrësit, Porto Romano, për të cilin do bëjmë një ndryshim të natyrës së financimit, është projekt strategjik dhe ka një urgjencë strategjike sepse kemi përfshirë dhe NATO. Do kalojmë me financim të brendshëm që mos varemi nga kohët e tejzgjatura dhe ngarkesat e tjera që burojnë nga financimet e huaja,” tha Edi Rama e meqë bluja dhe Saliu iu kanë bërë obsesion fillimisht kaloj te bluja në korridor.

“Në diskutimin për veprat e infrastrukturës rrugore, portuale, kemi një pamje shumë të qartë të ecurisë së punës me korridorin blu. Do hapim brenda vitit për qarkullim aksin Thumanë-Kashar, ku thuajse 17% e punimeve janë duke u realizuar. Do procedojmë para sezonit me nënshkrimin e kontratave për Kashar-Rrogozhinë, Rrogozhinë -Lekaj. Po punohet për fazën e parë të segmentit Milot-Muriqan. Nga ana tjetër kemi adresuar nevojë për financim të bypassit të madh te Elbasanit.

Kemi diskutuar financimin e katër kilometrave që duhen për të lidhur dhe 10 stacione nga Kashari në qendër të Tiranës. Jemi në proces dhe besoj se në fillim të vjeshtës do lidhim kontratën për punën për Vorë-Hani i Hotit. Kemi fituar nga fondet europiane financimin për Durrës-Rrogozhinë. Ndërkohë kemi aplikuar për të shkuar më poshtë, Rrogozhinë-Pogradec,” tha Edi Rama duke folur për dëshirat e tij, e për të dëshmuar se sa shqiptar sensibël që është foli dhe për Kosovën.

“Kemi komunikuar dhe me Kosovën për ecurinë e projektit të hekurudhës Durrës-Prishtinë. Do kalohet nga Shkodra në Gjakovë dhe Prishtinë. Kjo është një zgjidhje shumë e dëshiruar dhe nga pala e Kosovës.”

Edhe sot e konfirmoi se jo dy ditë, por sikur të mbajë mbledhje edhe 200 ditë e hiq ma pak, Edi Rama i biri i Kristaqit, i do të gjitha pushtetet për vete! Ndonëse u mundua të ngjallte optimizëm me përfundimin e mbledhjes dyditore, ai sot ishte i prerë, nuk do të ketë lëshime për kërkesat e opozitës lidhur me Komisionet Hetimore, dhe derisa të ka flakadanë seanca, sipas Kryeministrit të Shkodrës, Himarës dhe gjithë Shqipërisë do ketë vetëm një skenar, mazhoranca do të votojë dhe do të largohet.

“Ligji është bërë mbi modelin bazë që u ndërtua ai ligj që në fillim, për arsye të panjohura nga mua, modelit bazë i janë hequr komponentë të për integritetin e një procesi hetimor parlamentar

Në parlament do qasemi siç janë qasur grekët, britanikë dhe ata që gëzojnë sot demokracinë dhe mundësinë që jep demokracia për të pasur parlament. Do qasemi për t’u ngritur për të folur kur marrim fjalën, dhe për t’u ulur kur të tjerët marrin fjalën. Sa kohë të kemi shëmbëlltyre të natyrës boks, mundje, hedhje gjyleje apo ndezje flakadanësh për lojërat e ardhme olimpike, ne do votojmë dhe do largohemi, sepse ne do bëjmë punën tonë,” tha prodhuesi i politikës më konfliktuale në historinë e Shqipërisë pluraliste duke lëshuar nga goja dhe një togfjalësh nga goja që as Spiropali nuk ja deshifron dot opozitës:

“Ne nuk jemi as skllevër as luanë. Ne jemi të gatshëm të bëjmë çdo negocim me premisën që konfliktimi fizik i jetës parlamentare të zgjidhet, dhe këtë nuk e zgjidhim ne!”