Dëshmi me patronazhistë që drejtohen nga Taulant Balla, Berisha: Raportin tonë do e dorëzojmë në PE dhe Këshillin Evropian

Kryetari i Partisë Demokratike, Sali Berisha, sot ka denoncuar me fakte, skandalin e madh të patronazhinimit të votës së diasporës nën drejtimin e ministrit Taulant Balla, duke u zotuar se Raportin e hartuar do t’ja japim parlamentarëve të PE-së dhe Ministrive të Jashtme të vendeve të BE-së.

“Votat në duart e partisë së krimit. Ky është vetëm një episod, ose një dëshmi, një fakt. Ekzistojnë të tjera në të cilat votat e diasporës u shtetëzuan dhe u manipuluan në shkallën që deshi, partia e krimit. Në shkelje të plotë të kontratës, dhe sigurisht ka vetëm një konkluzion: këto zgjedhje nuk mund të njihen kurrë,” tha Sali Berisha duke siguruar se nëse Edi Rama përdor gjithçka për të qëndruar në pushtet, atëherë dhe opozita do të përdorë gjithçka për ta larguar ndërsa përfundoi:

“Partia Demokratike këtë herë qëndron në politikë me një qëllim të vetëm, rikthimin e votës së lirë të shqiptarëve. Rikthimi i votës së lirë të shqiptarëve, realizohet vetëm e vetëm me largimin e Edi Ramës.”

Deklaratë:

Farsa elektorale 11 maj 2025, u bazua në një industri mafioze, të vërtetë, të manipulimit, falsifikimit, të votës së shqiptarëve në Shqipëri dhe në diasporë.

U bazua në presionin e jashtëzakonshëm të karteleve të drogës më të mëdha në Europë si, kartelet Poja apo Troplini, Çela, Bajri dhe organizata terroriste ‘Hakmarrja për drejtësi’ dhe shumë grupe të tjera kriminale.

Por veprimtarinë e tyre kriminale, në votën e diasporës e ushtruan zyrtarë të qeverisë dhe ata arritën duke shkelur kontratën, duke shkelur rregullore, të shtetërojnë, të marrin në duart e tyre të zeza, një proces themelor, kushtetues që zhvillohej për herë të parë në historinë e vendit.

Unë ju deklarova dje se kemi të dhëna të pafundme, dhe ato do ti paraqesim para jush dhe shqiptarëve, në mënyrë që edhe shqiptari i fundit të ketë të qartë se çfarë farse e shëmtuar u zhvilluar në 11 maj.

Problemi është se 11 maj, siç thekson dhe raporti i OSBE-ODIHR, mediat kryesore të vendit ishin të renditura në anën e farsës, në anën e qeverisë.

Ndaj dhe ka një përpjekje që të mbulohet farsa me të gjitha mënyrat. Kjo përpjekje, duke përdorur segmente të krimit, duke përdorur të gjitha format dhe nuk jepet e vërteta e farsës.

Sot këtu kemi sjellë disa foto dhe video, që faktojnë se patronazhisti është personi që merr në dorë votën e diasporës. I cili drejtohet direkt nga famëziu Taulant Begojaris. Ja ku e keni.

Krenar njëri me tjetrin për krimin që kryejnë. Ja ku është.

Votat në duart e partisë së krimit.

Ky është vetëm një episod, ose një dëshmi, një fakt. Ekzistojnë të tjera në të cilat votat e diasporës u shtetëzuan dhe u manipuluan në shkallën që deshi, partia e krimit.

Në shkelje të plotë të kontratës, dhe sigurisht ka vetëm një konkluzion: këto zgjedhje nuk mund të njihen kurrë.

PYETJE PERGJIGJE ME GAZETARET:

Anesti Bajramemaj, A2CNN: Çfarë pike kontrate është shkelur me këto video që na keni publikuar ditën e sotme. Në fushatë shumë eksponentë të PD-së, kanë publikuar video ku shqiptarët në diasporës votonin për PD dhe i reklamonin në mediat sociale. Ka qenë gabim atëherë, apo është gabim dhe sot që ai ka deklaruar edhe përkatësinë e tij politike.

Sali Berisha: Janë dy gjëra të ndryshme. Së pari ju e shikoni njeriun e Taulant Ballës, jo me një votues por me punonjës të DHL-së. Ju e patë personin, edhe në takim me Taulant Ballën edhe në foto dhe kjo dëshmon qartë për duart e zeza të Partisë së krimit brenda DHL-së. Këtu jemi brenda DHL-së, punonjës, jemi brenda.

Tani, cila pikë e kontratës është shkelur, është shkelur pika kryesore e kontratës; nuk mund të kishte subkontraktor. Dhe subkontraktimi u shkel pikërisht për tu nënkontratuar kompanitë që punuan ngushtë me PS-në, përfshirë Postën Shqiptare që shtriu duart në këtë proces.

Pra shkeljet janë flagrante. Ka shumë shkelje të tjera. Ky që e shihni ju me këto, i fut në një zyrë tjetër dhe i mbush vetë. Shihe. Kështu që kjo tregon se nuk ishte proces, por ishte një gjë që u bë në zyrat e partisë, nga njerëz të partisë. Të paguar janë, një pjesë janë të paguar. Kanë marrë pjesë dhe ish-zyrtarë dhe zyrtarë të ambasadave.

Asnjë nga këto të mos ishte, mjafton implikimi i postës shqiptare dhe ikën ai proces. Kurrë ne nuk do të ftonim të votonim me një postë që kalon nga Posta Shqiptare. Ajo dihet se kush kalon në postën shqiptare.

Besoj se këto janë prova.

Anisa Kadesha, RTSH: Mendoni se vota e diasporës do të jetë dhe bumerangu i këtyre zgjedhjeve, në kushtet kur Sinani, patronazhisti i PS-së thotë se do ti plotësojë dhe vetë, në rrjetet sociale të tij.

Sali Berisha: Vota e diasporës, ishte vota që presupozohej të ishte më e lira, vota e lirë e qytetarëve. Dhe shtetërimi i saj, tregoi vdekjen e saj pa hyrë në kuti.

Mendoj se farsa elektorale ka elementë të tjerë, kapitalë. Mendoj se një qeveri kurrë, kurrë nuk mund të shpërndajë para, bonuse në periudhë fushate elektorale. Kurrë nuk mund ta bëjë atë, sepse blen votë.

Mendoj se një qeveri kurrë nuk mund të falë 200 milionë euro gjoba dhe kamata, dy ditë para zgjedhjeve, nëse do u përmbahet parimeve ndërkombëtare.

Mirëpo këto bëhen gjithsej, të paktën 280-300 mln euro, të dhëna qytetarëve.

Mendoj se një qeveri kurrë nuk mund të shndërrojë punonjësit e saj në operatorë elektoralë. Nuk mund ta bëjë atë se pastaj nuk ka më shtet të drejtës, por ka shtet elektoral.

Kështu që në rast se flasim për farsë elektorale, strumbullari i farsës elektorale është shteti elektoral, sepse pastaj në fushë mbetet një gjigand me miliarda euro në dispozicion, me qindra mijëra mjete logjistike, automjete, zyra, dhoma, etj. Me të gjithë fuqinë ekzekutive të ligjit dhe të shtetit, me dhjetëra mijëra leje, punësime, legalizime etj.

Pra, farsa ka si gjenerator shtetin elektoral.

Sepse shtetet që organizojnë farsa, jo të gjitha përdorin kartelet e drogës. Kurse në Shqipëri përveç shtetit elektoral është narkoshteti, kartelet më të fuqishme të Europës.

Nuk mund të ketë sot në Europë një kartel më të fuqishëm se karteli Troplini, sepse është i vetmi kartel që e ka portin, port të lirë për kokainën.

Pas operacionit çfarë i bënë, çfarë pësuan? Asgjë. Një turp, turp i madh. Të gjithë Troplinët janë të lirë, paçka se shkojnë e shtrojnë në dru para 4-5 ditësh në ndjekje Gjushin.

Ku janë? Vazhdojnë të menaxhojnë portin, vazhdojnë të kontrollojnë portin. Vazhdojnë të presin ngarkesat, ti kalojnë. A ju kujtohet ju kontenieri që nuk kaloi skanerin, që erdhi nga porti i Durrësit dhe ata e hoqën nga skaneri, e prunë tek banesa e tyre, e shkarkuan dhe pastaj e dërguan atje.

Asnjë kartel në Europë nuk ka këtë fuqi.

Nuk ka si karteli i Suel Çelës, i cili kontrollon të gjithë heroinën. Autostrada e heroinës që vjen nga Turqia, Afganistani dhe shkon në Europë.

Nuk ka kartel si Bajrët që regjistrojnë me dhjetëra vrasje.

Pra, manipulimi i diasporës është një aspekt i shëmtuar i farsës, por farsa është e ngritur në të gjitha këto kolona që unë thashë më sipër.

KQZ-ja zbaton porositë e Edi Ramës. KQZ ka kontratën, dhe KQZ e di që kushti ynë ka qenë, jo nënkotraktor.

Por duheshin nënkontraktorët që një njeri të mbushte 30 mijë vota. Ti çoje në Greqi, janë punonjës. Prandaj del fiks, kaq vota do i jepen PD-së, të tjerat do i marrë PS-ja.

Nuk ka asgjë këtu. Janë qindra e mijëra vota që nuk kanë firmën e marrësit.

Mungojnë 40 mijë vota, janë përdorur këtu brenda për të mbushur kuti dhe për të ndryshuar rezultate.  

Ardit Hoxha, EuroNews: Përtej këtij rasti, a keni indicie apo informacione PD-ja, se që në momentin kur u miratua vota e diasporës dhe ndoshta dhe më vonë kur u vendos për këtë kompani që do të bënte dërgimin e fletëve dhe kthimin e votave në Shqipëri, të ketë pasur punësime apo njerëz, ndoshta të diktuar nga PS, përtej këtij rasti. A keni raste që punonjës të tjerë të kësaj kompanie të kenë bërë veprime të tilla, apo është vetëm ky rast.

Sali Berisha: Kemi raste kur nënkotraktorët kanë qenë në lidhje me eksponentë të PS-së, kemi raste dhe do i paraqesim.

Isa Myzyraj, OraNews: Po krahasoja raportet e OSBE-ODIHR, raportin paraprak të Shqipërisë dhe raportin paraprak të Serbisë në zgjedhjet e dhjetori 2023 dhe për hir të së vërtetës kritikat e raportit ishin pothuajse identike, përveç 2-3 komponentëve ku Shqipëria ishte më keq, përfshirë mbylljen e Tik-Tok. Por në atë kohë, në fillim të vitit 2024, Parlamenti Europian miratoi një rezolutë që u mbështet gjerësisht duke kërkuar hetim ndërkombëtar në Serbi, për zgjedhjet e asaj kohe. A është duke bërë PD përpjekje për një rezolutë të tillë në Parlamentin Europian, pasi ju keni dhe persona të afërt në PE që është zoti Beleri i cili pavarësisht se përfaqëson Greqinë, është i afërt dhe me PD.
Sali Berisha: Parlamenti Europian kësaj radhe i mori në mënyrën më serioze zgjedhjet në Shqipëri dhe jam shumë mirënjohës. Po flas si institucion jo si parti popullore.

Si institucion në mes të fushatës organizoi hiring, që është procedurë e jashtëzakonshme.  Për zgjedhjet në Shqipëri, emergjente.

Unë kam besim të plotë në përkushtimin e tyre ndaj votës së lirë.

Ata kishin vëzhguesit këtu, i patën. Kryetari i vëzhguesve të tyre foli, delegacioni i tyre ka qenë më i madh se asnjëherë tjetër me parlamentarë. Ai që i përfaqësonte foli, e dëgjuat.

Por ne do të paraqesim edhe raportin paraprak tonin, e apdetuam, ai ka qenë i pari fare. Sot përfunduam të dytin të apdetuar dhe do e paraqesim. Brenda një kohe sa më të shkurtër të mundshme do të paraqesim raportin përfundimtar, i cili do u dorëzohet të gjithë parlamentarëve të Parlamentit Europian, të gjithë parlamentarëve të vendeve anëtare, të gjithë ministrive të jashtme.

Ne do të bëjmë një përpjekje shumë të fuqishme, për tu treguar të vërtetën e votës në narkoshtetin e vetëm dhe të parë në Europë që është Shqipëria.

Po, por ne jemi mirënjohës shumë se bënë një hiring, kemi besim. Ne do ulemi me socialistë, do ulemi me të gjitha grupet, do u themi ja ku janë dokumentet. Ja çfarë ka ndodhur.

Pra, kjo është periudha ndërkombëtare e procesit, ne pastaj, sigurisht partia do bëjë analizat e veta, por do organizojë dhe qëndresën e saj për votën e lirë.

Ardit Hoxha, EuroNews: Mëngjesin e sotëm Edi Rama ka postuar një foto pasi është takuar dhe ka marrë urime nga një prej miqve tuaj personal, Elmar Brook, ka publikuar dhe një bisedë ku Brook sipas Ramës, e ka uruar për fitoren në 11 maj, pavarësisht se në fushatë z. Brook ne e pamë që ju mbështeti ju.

Sali Berisha: Ai mbetet një mik, dhe urimi i tij është një ironi. Është një ironi, mos e pyet. Ai është mik i shqiptarëve dhe i votës së lirë të tyre. Urimi është ironi.

Osman Stafa, News24: Thatë në fjalën e tuaj që do bëni veprime përkundrej kësaj që ka ndodhur, që ju e quani një farsë elektorale të 11 majit …

Sali Berisha: Jo e quaj unë. Këtu tani ne dallojmë. Nëqoftëse nuk arrijmë ti themi të zezës, të zezë, atëherë njëri nga ne ka problem me sytë, por ne të dy i kemi në rregull sytë.

Osman Stafa, News24: Ju thoni që do bëni reagimin tuaj në atë që e konsideroni si farsa e 11 majit. Ju këtë gjë keni thënë dhe në 2023, në zgjedhjet lokale, madje keni qenë dhe më i ashpër, duke deklaruar se do merrni dhe masa. Çfarë do bëjë ndryshe PD këtë herë?

Sali Berisha: PD këtë herë qëndron në politikë me një qëllim të vetëm, rikthimin e votës së lirë të shqiptarëve. Rikthimi i votës së lirë të shqiptarëve, realizohet vetëm e vetëm me largimin e Edi Ramës.

Osman Stafa, News24: Këtë e keni thënë edhe në 2023, nuk e larguat, kërkuar qeveri teknike …

Sali Berisha:  Se nuk është realizuar kjo nuk do të thotë se nuk do realizohet.

Ju e shifni tani që ka një reagim ndërkombëtar. Kur 4 rezoluta ndërkombëtare i kanë shpallur farsë pa u zhvilluar. Farsë thonë. Shërbejnë për të larguar Edi Ramën

Për të ndërgjegjësuar çdo shqiptar se, me Edi Ramën nuk ka votë të lirë. Nëqoftëse Edi Rama bën çdo gjë për të mbajtur pushtetin, ne do bëjmë çdo gjë për largimin e tij. Kjo është.

Osman Stafa, News24: Çfarë do bëni?

Sali Berisha: Tani këtu, kur unë them çdo gjë, por them atë që do bëjmë. Natyrisht rruga e dhunës përjashtohet, të gjitha rrugët e tjera.

Edhe tani me këto që po nxjerrim para jush dhe që po bëjmë përpara komunitetit ndërkombëtar, pjesë e kësaj përpjekje janë.

Faleminderit!