Dëshmi/ Ylli Krasniqi: Si më dënoi dy herë sigurimsi Bujar Sheshi!
Ish i burgosuri politik i diktaturës komuniste, Ylli Krasniqi, është një nga viktimat e hetuesit sigurims Bujar Sheshi. Krasniqi jeton aktualisht në Gjermani pasi është larguar nga vendi që në vitin 1991 pas lirimit nga burgu. Z. Krasniqi, fisnik si shumica e të burgosurve polikë e ka të vështirë të flas për torturat dhe vuajtjet e tij në hetuesinë e drejtuar nga Bujar Sheshi si dhe ndjekjen e tij nga Sigurimi, para, gjatë dhe pas burgimit të tij. Për gazetën “Minerva”, Ylli Krasniqi rrëfen historinë e përndjekjes së tij nga Bujar Sheshi dhe Sigurimi i Shtetit.
E veçanta në dëshminë e Krasniqit është fakti se ai është arrestuar edhe përndjekur edhe pas arratisjeje në Jugosllavi në vitin 1989 me dosjen hetimore që i ka përgatitur Sheshi në Fier. Dosja e Bujar Sheshit ishte përcjelle nga Sigurimi apo ndoshta edhe nga vet hetuesi tek UDB-ja në Beograd, thotë Krasniqi.
Dëshmia e plotë e Krasniqit
Historia ime dhe e familjes sime është e shumë e hidhur. Babai im erdhi në Shqipëri në vitin 1958 për shkak të përndjekjes nga UDB dhe regjimi serb në Kosovë.
Ne rrjedhim nga një familje e njohur nacionaliste (ballistësh) që prej katragjyshit. Kemi dhe shumë tokë në Kosovë, direkt ku gjenden minerale si kuarci, qymyri etj e gjitha në emër të babait tim. Kur babi im erdhi në Shqipëri, UDB-ja njoftoi Sigurimin për qëndrimet nacionaliste e antikomuniste të familjes sime dhe ne automatikisht u klasifikuam si armiq edhe nga qeveria shqiptare dhe u vumë në ndjekje nga Sigurimi i Shtetit. Dihet që komunistët bashkëpunonin direkt me serbët deri në fund të reagimit të tyre e bashkojnë edhe sot.
Jam ndjekur hap pas hapi për tre vjet resht nga Sigurimi i Shtetit në mënyrë të veçantë nga Bamir Shehu që prej muajit Shkurt 1980 deri në 5 Nëntor 1983 ditën e arrestit . Më ka përgjuar dhe ndjekur nga mbrapa ç’do lëvizje timen. Kishte në mbështetje Viktor Prendin dhe Lavdi Balla të cilët e informonin për çdo gjë që bëja unë. Këta me dolën dhe dolën dhe dëshmitarë në gjyq ku dëshmuan sipas porosive që kishin marrë në Hetuesi. Hetuesi i Sigurimit, Bujar Sheshi ishte arkitekti i dosjes hetimore dhe përndjekjes sime. Më prangosi personalisht me urdhër të Reshat Leskaj, ishte dhe hetuesi që drejtoi hetimin dhe torturimin tim gjatë muajve të izolimit.
Jam arrestuar në sallën ku mbaheshin mbledhje mbi ish kinemanë e vjetër lagja Kastriot-Fier, në një mbledhje me të rinjtë të organizuar nga Sigurimi dhe Rinia Komuniste ekstra, vetëm për mua. Kryetari i Degës së Punëve të Brendshme Fier mbajti fjalën kryesore duke më cilësuar një “armik të popullit dhe partisë” e trajtoi çështjen sikur unë isha terroristi e armiku më i madh i vendit.
Ky spiuni apo hetuesi i zellshëm i Sigurimit, Bujar Sheshi rrinte mbrapa meje.
Mua më kishin ulur në një karrige si në bankën e të akuzuarit dhe këta drejtuesit e sigurimit me bënin gjyqin e parë publik. Sheshi me pardesytë karakteristike të Sigurimit, rrinte në këmbë mbas meje gjatë gjithë kohës.
Më në fund, me fjalët “në emër te popullit je i arrestuar” më lidhi me tel dhe më futën në birucën Nr.18, në Degën e Brendshme, një birucë e tmerrshme e përgatitur enkas për vetëm për një person.
Atje dihet se çfarë të priste, dhunë dhe tortura 24 orë. Sheshi drejtonte e urdhëronte gjithçka, nga presioni psikologjik natën dhe ditën dhe sidomos torturave fizike nga me çnjerëzoret. Gjëra që tani dihen, prandaj nuk po zgjatem në detaje për to se është edhe një histori e gjatë dhe shumë e trishtë.
Mendojeni vetë çfarë po ndodhte. Sapo kisha mbushur 18 vjeç dhe isha shpallur “armiku i madh i partisë “. Akuzat ishin nga më absurdet dhe më të rëndat. Akuzohesha për “agjentura me shtetin jugosllav” në bashkëpunim me gjyshen time 82 vjeçare, si dhe me motrën e lindur në Kosovë. Ishte e tmerrshme në një familje nacionaliste që kishin ardhur në Shqipëri për ti shpëtuar terrorit serb, akuzoheshim për agjentë të serbëve, me akuza të sajuara nga Sheshi dhe Sigurimi. Më dënuan 12 vjet burg …!
Por persekutimi im nga Sheshi dhe sigurimi i tij nuk mbaron këtu. U lirova nga burgu ne vitin 1989 dhe menjëherë u arratisa në Jugosllavi nga Mali i Zi. Atje më arrestuan jugosllavët. Bëra 5 muaj Burg në Prishtinë.
Në hetuesinë që UDB më bëri në Prishtinë më akuzonin si për anti-jugosllav e anti-serb. U befasova kur si prova më paraqitën dosjen time hetimore të Fierit, të përgatitur nga Bujar Sheshi ku unë kisha deklaruar qëndrimet e mia dhe të familjes sime kundër serbëve dhe jugosllavëve.
Kështu u dënova dy herë nga Bujar Sheshi, një herë si agjent serb në Shqipëri dhe një herë si anti-serb në Jugosllavi, ku bëra 5 muaj burg.
Kam prova shkresore për dosjen e Sheshit që i ishte përcjellë UDB-së në Beograd, po i kam në shtëpinë time në Prishtinë, me ti marrë do t’iu a vë në dispozicion për botim. Nuk është rasti i parë që shqiptarët e Kosovës dënoheshin në Jugosllavi me dosjet e përgatitura nga Sigurimi i Shtetit në Shqipëri. Ata bashkë ishin kudo dhe kurdo.
