“Dëshmia Alizoti”/ Alarm, Basha: Diktaturë mafioze, Edi Rama sulmon…
Jemi në kushtet e një diktature mafioze. Kështu ngre alarmin kryetari i Partisë Demokratike, Lulzim Basha një ditë pas publikimit të audiopërgjimit të Alfred Alizotit nga deputeti demokrat Ervin Salianji, duke pasqyruar sjelljen aktuale të këtij pushteti se si me dhunë sulmon gazetarët, denoncuesit, policët e ndershëm dhe kundërshtarët politikë vetëm e vetëm, për të mbrojtur kriminelët.
“Mbrëmë shqiptaret panë fytyrën e shtetit, provat dhe përbërjen e tij, deputetë, drejtorë të policisë, prokurorë që fabrikojnë prova dhe dëshmitarë për të shpëtuar kriminelet, drejtues dhe pjesë e strukturës
janë edhe Fatmir Xhafaj dhe Arta Marku. Pra Rama, Ministri i Brendshëm, kreu i grupit të PS, Prokurorja e Përgjithshme, kreu i Policisë kanë komplotuar së bashku direkt për të manipuluar të vërtetën për të mbrojtur trafikantin e drogës, Agron Xhafaj dhe vëllanë e tij”, tha Basha.
“Shteti privat i Ramës fabrikoi dëshmitarë për të sulmuar denoncuaesit, opozitarë për të shpëtuar trafikantin dhe mbrojtësin e tij. Është i njëjti shtet që ka manipuluar të gjithë, ca për të mbrojtur Ballën dhe Rrahman Rrajën, edhe në këtë rast Rama kërcënoi me gjuhë mafioze Nuhun për të shpëtuar Rexhep Rrajën dhe mbrojtësin e tij, Balla,” tha Lulzim Basha duke shtuar se ky pushtet më pas, me dhunë sulmon gazetarët, denoncuesit, policët e ndershëm, kundërshtarët politikë për të mbrojtur kriminelët. Pra, jemi në kushtet e një diktature mafioze.
“Emërimi i Xhafajt ishte triumfi i njërës bandë mbi tjetrën, ata triumfuan nga Habilajt dhe Tahirët. Policia e Shtetit në shërbim të krimit nga Tahiri vazhdon të jetë në shërbim të krimit nga Xhafajt. Emërimi i Arta Markut një katastrofë në drejtësi, ajo u soll politikisht në krye të prokurorisë për të mbrojtur lidhjet e qeverisë me krimin dhe e ka bërë me suksese, e ka shkatërruar prokurorin e Krimeve të Rënda, hetimet për Tahirin, për Gjinorin, Dakon, Sejdinin, Xhafajn, Manjën e drejtues të tjerë të qeverisë, ajo nuk ka për të hetuar për politikanin bandit Taulant Balla.”
Drejtësia e korruptuar është kthyer në drejtësi kriminale, konstaton kryetari i i Partisë Demokratike, Lulzim Basha në situatën e krijuar duke përfunduar:
“Deri dje njerëzit i paguanin para prokurorëve, sot duhet të jesh i lidhur me Ramën ose kriminelët që të marrësh drejtësi, kjo diktaturë mafioze duhet të shkatërrohet dhe do të shkatërrohet, të gjithë ata që një pjesë e tij dhe ndihen mbi ligjin do të japin llogari para ligjit, Rama, Xhafa, Marku, Veliu dhe gjithë shërbëtorët e tjerë do të dalin para drejtësi.”
