Dështimi i radhës në përpjekje për konstituimin e Parlamentit të Kosovës

Dështoi edhe për herë të 49-të përpjekja për konstituimin e legjislaturës së nëntë të Parlamentit të Kosovës.

Kryesuesi i seancës, Avni Dehari, kërkoi sërish nga subjektet politike parlamentare të cilat nuk i kanë propozuar emrat për anëtarë të komisionit zgjedhor për zgjedhjen e Kryetarit të Parlamentit që ta bëjnë këtë, por propozime nuk pati.

Nga 104 deputetë prezentë në seancë prej të cilëve 53 votuan për, asnjë kundër dhe asnjë abstenim, u konfirmua qëndrimi i pandryshuar i partive parlamentare ku deputetët tjerë nuk morën fare pjesë në votim, sërish duke mos u arrit formimin e Komisionit për votim të fshehtë për zgjedhjen e Kryetarit të Parlamentit.

Kryesuesi i seancës Avni Dehari njoftoi se seanca ndërpritet për të vazhduar të mërkurën, 23 Korrik, me fillim në ora 11:00.

Bashkëkryetari i partisë Guxo, Faton Peci, ka thënë se partia e tij, në koalicion me Lëvizjen Vetëvendosje dhe Alternativën, kanë bërë shumë përpjekje për konstituim të Kuvendit, dhe u ka bërë thirrje të gjithë deputetëve për të reflektuar mbi situatën e krijuar.

“Përpjekjet vazhdojnë. Kryeministri në detyrë ka pasur ofertë konkrete për disa parti politike. Aktualisht ka dhënë ofertë për Nismën Socialdemokrate, ndërsa në një fazë më të hershme ka pasur ofertë për të diskutuar për bashkëqeverisje me Lidhjen Demokratike të Kosovës,” tha Faton Peci duke rikujtuar se edhe me Kushtetutë, Kryetari i Parlamentit i takon grupit më të madh, në këtë rast Lëvizjes Vetëvendosje.

Ndryshe, deri më tani kanë kaluar vetëm dy pika të seancës konstituive: Raporti i Komisionit të përkohshëm për verifikimin e mandateve, dhe, betimi i deputetëve; Seanca ka ngecur te pika e tretë, zgjedhja e Kryetarit Parlamentit.

Kandidatja e propozuar për Kryetar të Parlamentit nga Lëvizja Vetëvendosje, Albulena Haxhiu, po konsiderohet si figurë përçarëse nga PDK dhe AAK ndërsa LDK është shprehur se nuk voton asnjë kandidat të propozuar nga LVV.

Afati i përcaktuar nga Gjykata Kushtetuese për konstitutim të Parlamentit është 26 korriku, por nuk u dhanë hollësi se si duhet të veprohet nëse partitë nuk dakordësohen deri atëherë.

Presidentja e Kosovës, Vjosa Osmani ka paralajmëruar se do t’i drejtohet Gjykatës Kushtetuese këtë javë.