Dështon edhe përpjekja e 17-të për konstituimin e Parlamentit të Kosovës

Sot ka dështuar edhe përpjekja 17-të për konstituim të legjislaturës së nëntë të Parlamentit të Kosovës.

Edhe sot dështoi formimi i Komisionit për votim të fshehtë për zgjedhjen e Kryetarit të Parlamentit, me 53 vota për një kundër, asnjë abstenim.

Seanca e radhës do të mbahet të hënën në orën 10:30.

Në fillim të seancës, deputetët nderuan me një minutë heshtje veprimtarin Ukshin Hoti në 26-vjetorin e zhdukjes së tij.

Ndryshe, që nga seanca e betimit të deputetëve më 19 prill, gjithçka ka ngecur në pikën për zgjedhjen e Kryetarit të Parlamentit.

Pas dështimit të 16-të, Presidentja e Kosovës, Vjosa Osmani, zhvilloi një takim me përfaqësues të partive politike në përpjekje për të tejkaluar këtë ngërç politik, por Presidentja Osmani e pranoi se nuk kishte dakordësi rreth konstituimit të Parlamentit ndonëse kishte një “disponim minimal” tek liderët partiak për një zgjidhje të kësaj çështje.