Dështon edhe përpjekja e 18-të për konstituimin e Parlamentit të Kosovës

Për herë të 18-të ka dështuar përpjekja për konstituimin e legjislaturës së nëntë të Parlamentit të Kosovës. Edhe këtë herë, para vazhdimit të seancës, kryesuesi Avni Dehari ftoi përfaqësuesit e subjekteve politike për një konsultim të shkurtër.

Megjithatë, qëndrimi i partive nuk ka ndryshuar dhe si rrjedhojë sërish nuk u arrit formimi i Komisionit për votim të fshehtë për zgjedhjen e kryeparlamentarit, me 52 vota për, një kundër dhe asnjë abstenim.

106 deputetë ishin të pranishëm në sallë.

Seanca e radhës do të mbahet të mërkurën e 21 Majit në orën 11:00.

Deri më tani janë kaluar vetëm dy pika të seancës konstituive: Raporti i Komisionit të përkohshëm për verifikimin e mandateve, dhe, betimi i deputetëve; Seanca ka ngecur te pika e tretë, zgjedhja e Kryetarit Parlamentit.

Ndryshe, kandidatja e propozuar për Kryetar të Parlamentit e Lëvizjes Vetëvendosje, Albulena Haxhiu, po konsiderohet si figurë përçarëse nga PDK dhe AAK ndërsa LDK është shprehur se nuk voton asnjë kandidat të propozuar nga LVV.