Dështon Ish-Gjeneral Lleshaj, grabitësit vjedhin miliona euro në Rinas
Në Bregun e Lumit, Ish-Gjeneral Sandër Lleshaj demonstroi ligjin me policinë e pajisur deri në fyt me armë dhe gaz lotsjellës ndaj banorëve që po mbronin shtëpitë e tyre ku është menduar të ndërtohet “Bulevardi i Ri”.
Pak kilometra afër Bregut të Lumit, në objektin e rëndësisë më të veçantë në Shqipëri, për të cilën duhet të kujdeset po kjo polici që dhunon, terrorizon dhe përgjakë qytetarët që mbrojnë shtëpitë e tyre, në Aeroportin e Rinasit ndodhë një grabitje spektakolare, me skenar të përsëritur nga viti 2016.
Për shkaqe të konfidencialitet të bankave pronare të parave të vjedhura, thuhet se janë vjedhur disa milionë euro por nuk jepet shifra e saktë.
Ajo që është e saktë aktualisht, dihet se grabitësit u futën në pistë, deri tek avioni i udhëtarëve i cili duhej ti transportonte edhe këto miliona euro, dhe morën paratë që i kishin menduar ti marrin për qejfin e tyre.
Pas kritikave për këtë dështim të Ish-Gjeneral Sandër Lleshajt, ministr i Brendshëm mohoi gjithçka duke theksuar se “populli është me policinë”. Nga raportimet e mediave mbi detajet e grabitjes, dhe atyre që u raportuan nga Bregu i Lumit, rezulton se vetëm grabitësit janë me policinë. Populli i shkretë ngeli pa udhëtuar me avionin me të cilin kishin planifikuar të kryejnë punët e tyre në Vjenë ndërsa ata nga Bregu i Lumit po kurohet në spital nga plagët e marra tek Bregu i Lumit.
Grabitja
“BW” ka sjellë pamjet ekskluzive të qarta të grabitjes. Bëhet fjalë për momentin kur grabitësit të armatosur i janë afruar avionit dhe kanë kryer grabitjen e 10 milionë eurove në pak minuta, ndërsa në avion ndodheshin 160 pasagjerë që prisnin të udhëtonin drejt Vjenës.
Në pamje duket një person i ngjashëm me personin e vrarë, me syze por pa maskë në fytyrë, jelek të zi dhe pantallona të zeza. Ai ndodhet anash avionit, pranë barkut, ku ndodheshin edhe paratë. Para tij, ndodhet grabitësi tjetër por me uniformë tjetër, me lara ushtarake (uniformë operacionale) teksa me armën e ngritur kërcënon punonjësit. Të dy mbajnë në duar doreza. Po kështu duken edhe bagazhet teksa futen në avion.
Këto janë pamjet e para, të qarta të ngjarjes dhe grabitësve brenda pistës në aeroportin e Rinasit. Ngjarja ndodhi sot rreth orës 15:00, teksa pesë persona i janë afruar me një mjet ku shkruhej “hetimi tatimor”, aeroportit. Tre kanë hyrë brenda pistës dhe kanë marrë paratë, dy të tjerë kanë qëndruar në makinë.
Sapo kanë marrë paratë autorët janë larguar por janë përballur me FNSH-të dhe policinë kufitare të Rinasit në një rrugë dytësore ku kanë shkëmbyer zjarr. Gjatë shkëmbimit të zjarrit dyshohet se ka humbur jetën dhe grabitësi që duket qartë në foto, por nuk përjashtohet mundësia që ai të jetë qëlluar edhe nga bashkëpunëtorët e tij, pasi ka qenë i vetmi pa maskë. Viktima u hodh pranë lumit në urën e Tapizës nga pjesa tjetër e grupit. Ai nuk kishte asnjë mjet identiteti.
Policia ka gjetur furgonin me të cilin u krye vjedhja brenda të cilit kishte armatim. Ndërkohë që një automjet tjetër i cili u gjet i djegur mes Tapizës dhe Bathores dyshohet se është përdorur nga grabitësit për t’u larguar nga aeroporti. Forca speciale policore si RENEA e FNSH, të ndihmuara nga një helikopter janë ende në ndjekje të autorëve të tjerë grabitjes. Të angazhuara në operacionin e gjerë janë edhe forca nga Policia e Tiranës, Lezhës, Dibrës e Durrësit. Për ngjarjen policia ka shoqëruar mbi 40 persona që mund të kenë dijeni, mes tyre dhe punonjës të sigurisë së aeroportit. Ky është rasti i dytë i grabitjes së parave brenda pistës së aeroportit të Rinasit dhe i katërti i grabitjes së parave të bankave që shkojnë drejt Rinasit.
