Dështon Këshilli Politik, Bylykbashi: PS refuzoi sërish kompromisin, Gjiknuri: Opozita qëndrim bllokues!
Opozita e Bashkuar u nis e qartë në Këshilli Politik pas propozimit për hapjen e listave 100% me një shembull konkret nga Italia, por Përfaqësuesi i PS në Këshill, Damian Gjiknuri, thotë se ka shembull nga Letonia dhe Holanda që nuk përkojnë me ato që kërkon opozita.
Pas mbarimit të Këshillit Politik, Përfaqësuesi i Partisë Demokratike, Oerd Bylybashi, tha se PS nuk ka ndryshuar asnjë cm pozicionin e saj për ndryshimet e njëanshme kushtetuese dhe nga ana tjetër Damian Gjiknuri thotë se PD ka qëllimin e taktikës bllokuese dhe zvarritjen e këtij procesi.
“Në mbledhjen e sotme në Këshillin Politik u kërkua nga mazhoranca që të shprehet në parim nëse është dakord që të shprehet me propozimin për hapjen e listave me 100%, duke ruajtur koalicionet siç janë sot. Hasëm me rezistencë nga PS. PS nuk ka ndryshuar asnjë cm pozicionin e saj të pozicionit të njëanshëm të ndryshimit të kushtetueses, janë veprime që do të prishin marrëveshjen e 5 qershorit. Ne propozuam që të hiqet dorë nga ndryshimet e njëanshme. Të hartohet një amendament për hapjen e listave kemi një model që është i konsultuar dhe i marrë nga Italia. Nuk ka prodhuar asnjë lloj krize, modeli që përdor Shqipëria për koalicionet,” tha Bylykbashi duke përfunduar:
“Është vetëm lojë e Edi Ramës për të ndryshuar rregullat para zgjedhjeve. Jemi të gatshëm që të vazhdojmë diskutimin me transparencë e konsensus për të bërë së bashku amendime për hapjen e listave, pa prekur asgjë tjetër.”
Gjiknuri: Amendamentet kushtetuese s’pengojnë hapjen e listave 100% e koalicionet, opozita qëndrim bllokues
Përfaqësuesi i maxhorancës, Damian Gjiknuri deklaroi se opozita jashtëparlamentare nuk ka arritur që të bjerë në një gjuhë konsensusi me PS-në, ndërsa e akuzoi atë për bllokim të këtij procesi.
Në përfundim të mbledhjes së Këshillit Politik, Gjiknuri theksoi se me amendamentet kushtetuese, nuk pengohet hapja e listave 100%, madje dhe koalicionet parazgjedhore.
Ai ka bërë të qartë dhe formulën e saktë sipas të kompromisit mes palëve, për arritjen e dakordësisë për reformës zgjedhore. Gjiknuri i bëri thirrje opozitës që të sjellë një model nga një vend evropian, që i ngjason sistemit tonë zgjedhor.
“Pas një mbledhje të gjatë, opozita jashtëparlamentare, ndodhet në të njëjtat qëndrime bllokues, me qëndrimin e vetëm, të bllokimit me çdo kusht të implementimit të Kushtetutës. Së pari u konstatua fare qartë se amendimet kushtetuese dhe vet ata nuk japin asnjë argument përtej kushtit të pa negociueshëm, që thonë se; ‘ne duam që koalicionet të jenë në formën që janë’. U konstatua që amendimet kushtetuese nuk pengojnë as hapjen e listave 100% dhe koalicionet parazgjedhore. PD ka qëllimin e taktikës bllokuese dhe zvarritjen e këtij procesi. Opozita parlamentare ka ofruar kompromis edhe sot me qëndrimet e saj. Ata janë në të njëjtin pozicion, opozita jashtë. Ata thonë se shqetësimi jonë nuk është çështja e hapjes së listave, por kanë çështjen e koalicioneve. Iu kemi thënë që të zgjedhin një model ku paraqitet lista e kandidatëve, nga vendet që kanë këtë sistem. Një model është dhënë shembull nga PS, që ka qenë Letonia. Në mos Letonia, Holanda,” tha Gjiknuri duke përfunduar:
“Të gjejnë një model të një vendi perëndimor në këtë sistem dhe ne jemi të gatshëm që ta formulojmë në atë mënyrë koalicionin. Koalicioni lejohet, të marrin një shembull nga një vend i Be. Kjo është formula e kompromisit. Ne do marrim një model që e njeh këtë.”
