Dështon Komisioni i Ligjeve “online”, deputetët e opozitës futen në sallë, Kryetarja ndërprenë seancën…
Komisioni për Çështje Ligjore, Administratën Publike dhe Të Drejtat e Njeriut nuk e zhvilloi sot seancën e parë pasi Kryetarja Klotilda Ferhati hapi punimet e mbledhjes online ndërsa deputetët e Partisë Demokratike u futën në sallë. Kryesuesja e Komisionit u kërkoi deputetëve demokratë që të lidhen online sipas vendimit vendimit të Konferencës së Kryetarëve, deputetë e PD kundërshtuan duke theksuar se duan fjalën pasi janë prezent në sallë, dhe nuk është ajo që mund t’iu mohoj të drejtën e fjalës.
“Sipas njoftimit nga Sekretaria e Komisionit, të gjithë anëtarët janë lajmëruar për organizimin e kësaj mbledhjeje online. Të pranishëm janë këta kolegë. Po i marr me radhë sipas ekranit. Damian Gjiknuri, Alqi Bllako, Pëllumbi, Kollcaku, Deliu, Ndreca, Valikaj, Duraku, Celiku, Cyrbja, Xhoxhi, Hasalla dhe Gogu. Unë sipas rregullores drejtoj mbledhjen nga salla. Këtu kanë urdhëruar deputetët të PD që janë dhe anëtarë, janë të pranishëm, ju uroj mirëseardhjen, pavarësisht se kjo mbledhje është sipas vendimit të Konferencës së Kryetarëve të bëhet online. Ju lutem, për të respektuar vendimin logoheni online që të merrni pjesë,” tha Klotilda Ferhati ndërsa deputeti i PD, Gazment Bardhi, i këroi fjalën Kryetares së Komisionit të Ligjeve duke e akuzuar se nuk i jep fjalën opozitës.
“Nuk na e cakton ti. Duam fjalën, jemi prezent. Ti je prezent në sallë, ne jemi prezent në sallë, na jep fjalën. Nuk na i cakton ti ku logohemi dhe ku punojmë ne. A ka mundësi të na e japësh fjalën,” tha Gazemnt Bardhi duke shtuar:
“Nuk mund ti mohosh deputetëve të drejtën e fjalës!”
Pas ndërprerjes së punimeve të Komisionit të Ligjeve nga kryesuesja Klotilda Ferhati, deputeti i PD, Oerd Bylykbashi, para mediave u shpreh se mazhoranca ka mohuar të drejtën e fjalës së opozitës, me pretendimin për të zhvilluar mbledhjet e komisioneve online, por opozita, tha ai, do të jetë prezente në komisione, në ambientet fizike të saj dhe nuk do të lejojnë që qeveria të kthejë në ligj aferat korruptive të qeverisë.
“Deputetëve të opozitës, iu mohua sot në kundërshtim me kushtetutën, pjesëmarrja në komisionin e ligjeve dhe e drejta e fjalës. Është qartë mënyra për të hequr transparencën e qytetarëve. Ne jemi këtu që kjo të mos lejohet, ne do të respektojmë kushtetutën. Do të garantojmë transparencën për çdo shkelje të Edi Ramës. Nuk do të pranojmë që nëpërmjet këtyre mjeteve, me pretendimin që për arsye të pandemisë nuk zhvillohen mbledhjet fizikisht, ne do të jemi këtu për ta ndaluar këtë. Ne do të marrim pjesë në mbledhjet e komisioneve, do të jemi prezent,” tha Bylykbashi duke përfunduar:
“Bojkoti nuk mund të jetë një vendim i Edi Ramës, ne ishim prezent. Mazhoranca, Edi Rama, po i mohon opozitës mundësinë që të marrë pjesë dhe të kundërshtojë aferat që ai do të kthejë në ligj e në këtë mënyrë të zhvasë shqiptarët çdo ditë”, tha Bylykbashi.
