Dështon konstituimi i Parlamentit, Ambasadorët: Politikanët po e zhgënjejnë popullin

Dështimin e radhës të deputetëve për ta konstituuar Parlamentin e Kosovës, Ambasadori i Gjermanisë në Kosovë, Jorn Rohde, e quajti fatkeqësi, ndërsa ai i Bashkimit Evropian, Aivo Orav, vlerëson se Kosovës i nevojitet menjëherë një qeveri e re që do ta përshpejtojë rrugëtimin e sa drejt BE-së.

Duke folur në hollin e Kuvendit pak pas mbylljes së seancës, ai tha se “jemi këtu për ta theksuar shqetësimin tonë dhe urgjencën për të formuar insitucionet”.

“Qytetarët dolën për të votuar më 9 shkurt dhe tani janë bërë gati gjashtë muaj. Klasa politike po e zhgënjen popullin e vet dhe është shumë shqetësuese,” tha Ambasadori i Gjermanisë në Kosovë, Jorn Rohde, ndërsa për Vendimin e djeshëm të Gjykatës Kushtetuese shtoi:

“Nëse flasim me gjuhën e futbollit mund të themi si një karton i kuq sepse po e pezullon Parlamentin që të marrë vendime!”

I pranishëm në seancën e sotme edhe Shefi i Zyrës së Bashkimit Evropian në Kosovë, Aivo Orav, e pranoi se shkoi me shpresë të madhe në Parlament.

“Ne erdhëm me shpresë të madhe këtu dhe fatkeqësisht asgjë nuk ndodhi sërish. Kosovës i nevojitet një Parlament menjëherë, i duhet një qeveri e re që do ta ndërtonte një urë të re të fortë mes Kosovës dhe Brukselit që ta përshpejtojë rrugëtimin e sa drejt BE-së,” tha Aivo Orav.

Ndryshe, në seancën e sotme ku dështoi edhe përpjekja e 51-të për konstituimin e legjislaturës së nëntë të Parlamentit të Kosovës ishin prezentë edhe përfaqësues të Shteteve të Bashkuara, Mbretërisë së Bashkuar, Gjermanisë, Francës, si dhe shefi i Zyrës së BE-së në Kosovë.