Dështon përpjekja e 23-të e konstituimit të Parlamentit të Kosovës

Ka dështuar për herë të 23-të përpjekja për konstituim e legjislaturës së nëntë të Parlamentit të Kosovës.

Kryesuesi i seancës, Avni Dehari, kërkoi sërish nga subjektet politike parlamentare të cilat nuk i kanë propozuar emrat për anëtarë të komisionit zgjedhor për zgjedhjen e Kryetarit të Parlamentit, por propozimet munguan.

Nga 111 deputetë prezent, 55 votuan për, 1 kundër dhe nuk kishte abstenim, duke mos u arrit sërish formimi i Komisionit për votim të fshehtë për zgjedhjen e Kryetarit të Parlamentit.

Kryesuesi i seancës Avni Dehari njoftoi se seanca ndërpritet për të vazhduar të shtunën me fillim në ora 11:00.

Ndryshe, deri më tani kanë kaluar vetëm dy pika të seancës konstituive: Raporti i Komisionit të përkohshëm për verifikimin e mandateve, dhe, betimi i deputetëve; Seanca ka ngecur te pika e tretë, zgjedhja e Kryetarit Parlamentit.

Kandidatja e propozuar për Kryetar të Parlamentit nga Lëvizja Vetëvendosje, Albulena Haxhiu, po konsiderohet si figurë përçarëse nga PDK dhe AAK ndërsa LDK është shprehur se nuk voton asnjë kandidat të propozuar nga LVV.