Dështon përpjekja e 24-të e konstituimit të Parlamentit të Kosovës

Për herë të 24-të ka dështuar përpjekja për konstituimin e Parlamentit të Kosovës.

Kryesuesi i seancës konstituive, Avni Dehari, kërkoi sërish nga subjektet politike parlamentare të cilat nuk i kanë propozuar emrat për anëtarë të Komisionit Zgjedhor për zgjedhjen e Kryetarit të Parlamentit që ta bëjnë këtë, por propozime nuk pati.

Në seancë ishin prezent 96 deputetë, prej të cilëve 55 votuan për, 1 kundër dhe nuk kishte abstenim.

Kryesuesi i seancës Avni Dehari njoftoi se seanca ndërpritet për të vazhduar të hënën me 2 Qershor, me fillim në ora 11:00.

Ndryshe, deri më tani kanë kaluar vetëm dy pika të seancës konstituive: Raporti i Komisionit të përkohshëm për verifikimin e mandateve, dhe, betimi i deputetëve; Seanca ka ngecur te pika e tretë, zgjedhja e Kryetarit Parlamentit.

Kandidatja e propozuar për Kryetar të Parlamentit nga Lëvizja Vetëvendosje, Albulena Haxhiu, po konsiderohet si figurë përçarëse nga PDK dhe AAK ndërsa LDK është shprehur se nuk voton asnjë kandidat të propozuar nga LVV.