Dështon përpjekja e radhës për konstituimin e Parlamentit të Kosovës
Dështoi edhe për herë të 44-të përpjekja për konstituimin e legjislaturës së nëntë të Parlamentit të Kosovës.
Ajo që e dalloi seancën e sotme me përpjekjet tjera për konstituimin e Parlamentit ishte fillimi i saj ku me një minutë heshtje u përkujtuan viktimat e masakrës së Srebrenicës.
“Me 11 korrik të vitit 1995 në Srebrenicë të Bosnjës janë masakruar dhe janë vrarë mbi 8 mijë boshnjakë. Kjo masakër, ky gjenocid përkujtohet në gjithë botën demokratike, zyrtarisht përkujtohet edhe në Republikën tonë,” tha kryesuesi i seancës Avni Dehari ndërsa vazhdoi me kërkesën e tij drejtuar subjekteve politike parlamentare të cilat nuk i kanë propozuar emrat për anëtarë të komisionit zgjedhor për zgjedhjen e Kryetarit të Parlamentit që ta bëjnë këtë, por propozime nuk pati.
Nga 93 deputetë prezentë në seancë prej të cilëve 49 votuan për, asnjë kundër dhe asnjë abstenim, u konfirmua qëndrimi i pandryshuar i partive parlamentare ku deputetët tjerë nuk morën fare pjesë në votim, sërish duke mos u arrit formimin e Komisionit për votim të fshehtë për zgjedhjen e Kryetarit të Parlamentit.
Kryesuesi i seancës Avni Dehari njoftoi se seanca ndërpritet për të vazhduar të dielen, 13 Korrik, me fillim në ora 11:00.
Ndryshe, deri më tani kanë kaluar vetëm dy pika të seancës konstituive: Raporti i Komisionit të përkohshëm për verifikimin e mandateve, dhe, betimi i deputetëve; Seanca ka ngecur te pika e tretë, zgjedhja e Kryetarit Parlamentit.
Kandidatja e propozuar për Kryetar të Parlamentit nga Lëvizja Vetëvendosje, Albulena Haxhiu, po konsiderohet si figurë përçarëse nga PDK dhe AAK ndërsa LDK është shprehur se nuk voton asnjë kandidat të propozuar nga LVV.
