Dështon tenderi për portin e ri në Porto Romano, Karakaçi: Kompania u tërhoq për arsye të kostove

Ministri i Infrastrukturës dhe Energjisë Enea Karakaçi konfirmoi këtë të mërkurë se operatori i vetëm i mbetur  në garë për Portin e ri të Durrësit në Porto Romano është tërhequr për arsye ekonomike.

“Po kemi tërheqje të ofertuesit të vetëm që kishte mbetur në garë me një arsye krejtësisht ekonomike për shkak të rritjes së kostove. Si rrjedhojë e krizës ka një rritje të kostove totale të ndërtimit në përgjithësi dhe ofertuesi është justifikuar me këtë gjë. Komisioni do vijojë me procedurën sipas asaj që parashikohet.

Dua të rikujtoj faktin që para dy ditësh kryeministri u shpreh për këtë projekt ku nënvizoi se ka aktorë të llojeve të ndryshme që përpiqen ta frenojnë dhe sabotojnë këtë vepër të rëndësishme të vendit për qëllime të ndryshme duke përfshirë dhe ato ekonomike. Ne do të ndërtojmë një skenar tjetër me qeverinë dhe çdo aktor tjetër nuk do mundet ta frenojë këtë projekt sepse është shumë i rëndësishëm për zhvillimin ekonomik të vendit” tha Karakaçi.

Ai nënvizoi se vonesat ne përzgjedhjen e një kompanie që do të çojë para projektin nuk do të ndikojnë në aktivitetin normal të portit ekzistues në Durrës pasi aktualisht ndërtimi i Durrës Marina që po zë këtë terren përmes një marrëveshjeje me shtetin ndodhet ende në fazën e parë. Karkaçi tha se përgjatë procesit qeveria po asitohet nga konsulenti Royal Haskoning për të parë kushtet që përmbushin kompanitë e interesuara për projektin e ri të portit.

Porti i ri

Autoriteti Portual Durrës në vitin 2024 procedurën me objekt ndërtimin e “Porti i Ri Tregtar i Integruar i Durrësit në Porto Romano – Faza I” me një fond limit 39.3 miliardë lekë. Faza e parë e punimeve për portin llogaritet në 1220 ditë apo rreth 3.5 vite. Ndërtimi i portit do të shtrihet në disa faza dhe në këtë fazë të parë sipas dokumenteve që shoqërojnë procedurën janë parashikuar një sërë punimesh.

Gjatë muajit prill të vitit 2025, Komisioni i Vlerësimit të Ofertave njoftoi se pas fazës së para-kualifikimit, vetëm kompanitë “Archirodon Construction” dhe “Van Oord Dredging and Marine Contractors” arritën të kalonin filtrat teknikë, ndërkohë që emra të njohur si “Ëebuild” dhe bashkimi i operatorëve i udhëhequr nga “Jan De Nul” u skualifikuan nga gara.

Ky vendim solli edhe përplasjen e parë ligjore pranë Komisionit të Prokurimit Publik. Grupi i udhëhequr nga “Jan De Nul” dorëzoi një ankesë zyrtare duke kundërshtuar skualifikimin, por pas shqyrtimit të rastit, KPP vendosi ta rrëzojë këtë kërkesë në fund të prillit 2025, duke i dhënë të drejtë autoritetit kontraktor të vijonte me hapat e mëtejshëm.

Deri në shtator të vitit 2025, situata e garës u ngushtua akoma më tej, ku sipas të dhënave të hapura të prokurimit, vetëm një ofertë ekonomike rezultonte e kualifikuar për të vijuar drejt nënshkrimit të kontratës diçka që tashmë nuk është e mundur pas tërheqjes së kompanisë./Monitor/