Detajet/ Gjendet me plumb në kokë shoferi i ministrit Xhafaj, mbeten mister arsyet

Shoferi i ministrit të Brendshëm, Fatmir Xhafaj, është gjendur i pajetë në një automjet, në një garanzhd, pranë Gardës së Republikës.

Zyrtarisht Garda e Republikës, ka deklaruar se Shkëlzen Qordja, punonjës i këtij institucioni, është gjetur me një plumb në kokë, në automjetin që rezulton se është në pronësi të institucionit ku shërbente.

Mësohet se Qordja, 31 vjeç, prej vitesh ishte shofer i Fatmir Xhafajt. Gjithashtu ai rezulton  se ishte ende në detyrë dhe nuk ishte pezulluar, megjithëse disa media raportuan se dy ditë më parë ai ishte shkarkuar, duke aluduar se kjo ishte arsyeja që e kishte çuar drejt vetëvrasjes. Por në një reagim zyrtar, një prej zëdhënësve të Ministrisë së Brendshme, ka mohuar se Qordja të ishte pezulluar nga detyra.

Ngjarja e rëndë po hetohet nga prokuroria e Tiranës, ndërsa në vendin e ngjarjes mësohet se ka shkuar prokurori i gatshëm, Albert Demirneli.

Në anën tjetër, kreu i Policisë së Shtetit, Ardi Veliu, ka zhvilluar një takim me ministrin e Brendshëm, në zyrën e këtij të fundit, vetëm pak minuta pas ngjarjes së rëndë.

Ende nuk ka të dhëna nëse ngjarja është një vrasje apo vetëvrasje, ndërsa grupi hetimor po heton në të dyja pistat.

“Sot rreth orës 09:30 të mëngjesit, në garnizonin e Gardës së Republikës është gjetur i pajetë brenda garazhit, të caktuar për mjetet e Ministrisë së Brendshme, gardisti me detyrë funksionale shofer i Ministrit të Brendshëm, shtetasi Sh.Q., 31 vjeç. Trupi i pajetë u konstatua nga punonjës të Gardës.

Grupi hetimor nën drejtimin e Prokurorisë së Rrethit Gjyqësor Tiranë është duke punuar për të qartësuar shkaqet e ngjarjes dhe zbardhjen e rrethanave”,  thuhet në njoftimin e Gardës.