Detyrat për ministrat, Rama: Nesër vendimi i parë për të gjitha familjet që kanë humbur njerëz!
Duke ndarë detyrat për ministrat, Kryeministri Edi Rama u tha sot në mbledhjen e qeverisë se “nuk jeni të lutur ta bëni, jeni të detyruar ta bëni” dhe ndonëse u akuzua për mjeshtër të spektaklit ajo nuk është e tillë sepse vetëm sa shtoi më shumë dyshimet për paaftësinë e menaxhimit kur dihet që urdhri nuk është lutje por zbatim dhe nuk ka se pse të specifikohet si tillë. Duke e përfshirë edhe Laçin në gjendjen e jashtëzakonshme Edi Rama caktoi në kryet të operacionit për fatkeqësinë natyrore të shkaktuar nga tërmeti, ministrinë e Bujqësisë, Bledi Çuçi:
“Ngarkoj sot ministrin e Bujqësisë, si njeriu që do bëjë me fuqi të plota drejtimin e operacionit. Është një barrë plus për ministrin, ndaj i kërkoj një angazhim më të madh zv.ministrave përkatës të mbushin përkohësisht boshllëqet që do lërë ministri. Sfida e ministrit të Diasporës, Pandeli Majko, është të mbajë ndezur të gjitha kanalet e komunikimit me botën jashtë, ndërsa ministri i Jashtëm, Genti, të mbajë ndezur kanalet e komunikimit me të gjithë shqiptarët. Edhe unë vetë kam kërkuar vëmendje për Shqipërinë nga jashtë, por kjo nuk bëhet me një letër,” tha Edi Rama duke vazhduar me urdhërat:
“Ministrja e Infrastrukturës, së bashku me Zv.ministrin dhe me Kryetarin e Bashkisë Tiranë, kanë specifikisht detyrën që duhet të mbarojnë inventarin e apartamenteve të stokut në Durrës dhe Tiranë, pra që do të thotë apartamente bosh. Na duhet kjo urgjent. Jo thjesht një numër, por na duhet sipërmarrësi përkatës, situata e apartamenteve, apartamente që janë bosh fare apo që kanë orendi brenda.”
Me këtë rast Kryeministri foli edhe për strategjinë e strehimit të mibjetuarëve në Thumanë:
“Nuk është e mençur që ne të ndërtojmë pallatet në Thumanë ashtu siç ishin. Edhe me Elvis Naçin e diskutuam. Ata që punojnë në Tiranë, është më mirë t’i sjellim këtu, pse duhet të qëndrojnë sërish atje. Edhe banorët e tjerë mund të jenë shumë më mirë këtu. Ndërsa me banorët që janë të lidhur atje me tokë, gjënë e gjallë, do bëjmë të pamundurën t’i rregullojmë atje,” tha Rama ndërsa kishte një porosi edhe për Zv.ministren së Kulturës për përgatitjen e dosjes së parë të fotove dhe të fakteve nga terreni për të kërkuar mbështetje.
“Është bërë gati materiali, por duhet bërë një dosje shumë dinjitoze, që ta dorëzojmë te liderët, institucionet, donatorët, sipërmarrësit, që të informohen. Të gjithë që jeni ulur këtu në tavolinë jeni të detyruar të jenë në këmbë dhe në funksion të drejtuesit të operacionit. Mandati i Çuçit është fuqiplotë dhe për këtë temë ai është ministri fuqiplotë, të gjithë të tjerët janë në funksion. Çuçi është komisar fuqiplotë, duhet të ndiqen të gjitha ato që kërkohen, një për një,” tha Kryeministri Edi Rama duke garantuar se brenda vitit 2020 nuk duhet të ketë më asnjë diskutim për të gjithë ata persona që kanë humbur shtëpitë nga tërmeti ndërsa përfundoi: “Do jenë rregulluar më mirë seç ishin. Nesër do marrim vendimin e parë për të gjitha familjet që kanë humbur njerëz. Për ta nesër duhet këtu në tryezë një paketë speciale e drejtpërdrejtë!”
