“Detyrë e Komitetit Teknik”, Përgjigjet Basha: Pa testuar, pa gjurmuar, pa izoluar, pasojat…

Ndonëse Kryeministri Edi Rama u mundua ta bindë opinionin se është Komiteti Teknik ai që vendos për testimet dhe akuzoi Partinë Demokratike se nuk mund të jep mend as për tabelën e shumëzimit, Kryetari i Partisë Demokratike, Lulzim Basha, reagon duke theksuar se sulmet kundër opozitës nuk i fshehin dot dështimet e tij ndërsa përsëriti thirrjen për qeverinë duke shtuar se testimi masiv është e vetmja mënyrë për të zbuluar sa thellë është futur virusi në familjet tona.

“Pa testuar, pa gjurmuar, pa izoluar, pasojat do të jenë shumë të rënda! KM po fshihet pas një komiteti teknik, me shpresë që njerëzit mos ta shohin se sa i papërgatitur është, thekson Lulzim Basha në reagimin e tij duke shtuar se është përgjegjësi e qeverisë që të mbrojë shëndetin e njerëzve, të pajisë me mjetet e duhura ekipet mjekësore dhe të mbajë në këmbë ekonominë.

Ndryshe, pas kërkesës së Kryetarit të Partisë Demokratike, Lulzim Basha, për rritjen e numrit të testimeve, Kryeministri Edi Rama në reagimin e tij tha se PD s’mund të japë mend as për tabelën e shumëzimit, jo më për strategjinë e testimit!

“Strategjia e testimit është detyrë e Komitetit Teknik që udhëheq luftën në vijën e zjarrit.Detyra e politikës, qeverisë a opozitës është të dëgjojë dhe mbështesë ekspertët. Të tjerat janë 7×7=42.”

Deklaratë:

Testimi masiv është e vetmja mënyrë për të zbuluar sa thellë është futur virusi në familjet tona. Pa testuar, pa gjurmuar, pa izoluar, pasojat do të jenë shumë të rënda!

KM po fshihet pas një komiteti teknik, me shpresë që njerëzit mos ta shohin se sa i papërgatitur është.

Është përgjegjësi e qeverisë që të mbrojë shëndetin e njerëzve, të pajisë me mjetet e duhura ekipet mjekësore dhe të mbajë në këmbë ekonominë. Sulmet kundër opozitës nuk i fshehin dot dështimet e tij.