Dezinformimi me COVID-19 shkaktoi 800 të vdekur

Në tre muajt e parë të këtij viti, në të gjithë botën, të paktën 800 njerëz kanë vdekur për shkak të dezinformimit për COVID-19, thonë studiuesit.

Një studim i botuar në Gazetën Amerikane të Mjekësisë Tropikale dhe Higjenës thotë se rreth 5.800 njerëz u pranuan në spital si rezultat i informacionit të rremë në mediat sociala, raporton BBC.

Shumë vdiqën nga pirja e metanolit ose produkteve të pastrimit të bazuar në alkool.

Ata gabimisht besuan se produktet ishin një ilaç për virusin.

Organizata Botërore e Shëndetësisë, OBSH, është shprehur se lajmet e rreme për COVID-19 po përhapen po aq shpejt sa vetë virusi, me teori konspirative, thashetheme dhe stigma kulturore, që të gjitha duke kontribuar në vdekje dhe lëndime.