Dhëndër i Beogradit, diplomati amerikan Matthew Palmer, në misionin e pajtimit Kosovë-Serbi
Ende nuk është përcaktuar kryenegociatori i SHBA në fazën e ardhshme të negociatave Kosovë-Serbi, që të gjithë e konsiderojnë edhe si fazë finale, por burimet dilomatike në Perëndim theksojnë se rolin kryesor në këtë proces do ta ketë Zv/ndihmës Sekretari amerikan i shtetit, Matthew Palmer.
Kështu shkruan e përditshmja e Beogardit “Danas” dhe për të mos harruar se është gazetë serbe, thekson edhe detajin më të rëndësishëm që e bënë të besueshëm për Serbinë: Matthew Palmer është i martuar me serbe nga Beogradi!
Por “Danas” flet edhe për diplomatin amerikan i cili më shumë se dy dekada me kujdes e vëzhgon situatën në Ballkanin Perëndimor, e fol rrjedhshëm gjuhën serbe, dhe që nga viti 1998 din për çdo detaj që ndodhë në çdo cep të Kosovës, dhe do të përfshihet në misionin e pajtimit të Kosovës dhe Serbisë, që për momentin duket i pamundur.
Në muajin tetor, gjatë një interviste për televizionin publik të Serbisë, RTS, Matthew Palmer tha se “nuk ka çek të bardhë dhe as vija të kuqe”, por marrëveshja në mes të Kosovës dhe Serbisë duhet të arrihet sa më shpejtë.
“Atë që ne do të dëshironim të arrihet është normalizimi i plotë i marrëdhënieve në mes të Kosovës dhe Serbisë, e kjo është një sfidë komplekse,” theksoi diplomati i njohur amerikan.
Sipas tij, çdo lloj marrëveshje duhet ta ketë “aspektin e sigurisë, komponentën politike dhe ekonomike, dhe diçka për pronën e Kishës Ortodkse të Serbisë në Kosovë, Gazivodë dhe Trepçë”.
“Pra, do të ishte një marrëveshje komplekse e për neve është e rëndësishme që të arrihet këtu, që të jetë e përhershme dhe e pandryshuar. Jemi të gatshëm që të dëgjojmë çfarëdo llojë marrëveshje që të dyja palët do ta arrijnë, dhe që plotëson kushtet,” citon e përditshmja serbe, Zyrtarin e lartë të Departamentit të Shtetit.
Në pyetjen për shkëmbimin eventual të territorit, rikujton “Danas”, Palmer tha se “nuk do të futej në detaje” sepse nuk është prezantuar asnjë propozim për marrëveshje.
Matthew Palmer ka qenë Drejtor i Zyrës për Evropën Juglindore pranë Departamentit të Shtetit. Në fillim të karrierës ka punuar në Ambasadën e SHBA në Beograd, ku nga viti 1993 deri në vitin 1995 ishte i ngarkuar për hartimin e raporteve dhe vlerësimin e çështjeve politike dhe ekonomike për nevojat e administratës në Washingto, dhe është marrë edhe me luftën në Bosnje Hercegovinë.
Nga viti 1997 deri në vitin 1999 ishte Koordinator i diplomacisë amerikane ndaj Republikës Federale Jugosllave, SRJ, dhe ka marrë pjesë në negociatat për Kosovën që u zhvilluan në Rambuje, marrëveshje të cilën pala sebe nuk e firmosi dhe dihet se si përfundoi.
Më pas bëhet Këshilltar i Presidentit amerikan për Siguri Kombëtare për rajonin e Evropës, dhe nga viti 2011 deri në vitin 2014 sërish ka punuar në Ambasadën e SHBA në Beograd, si këshilltar politik. Konsiderohet si një strateg i jashtëzakonshëm në veçanti në fushën e “krizës diplomatike”. Përveç se është marrë me Ballkanin, është edhe ekspert përAfrikën. Ka dhënë kontribut në krijimin dhe zbatimin e “procesit kimberlian” përmes të cilit “diamantët e përgjakshëm” u përjashtuan nga tregu, thekson e përditshmja serbe “Danas”.
