Dhuna ndaj grave/ Gjykata Kushtetuese i përgjigjet Veselit

Gjykata Kushtetuese e ka deklaruar të pranueshme kërkesën e kryetarit të Parlamentit të Kosovës, Kadri Veseli, lidhur me një amandament të miratuar nga deputetët e Parlamentit të Kosovës “për parandalimin dhe luftimin e dhunës kundër grave dhe dhunës në familje”.

Më 24 tetor të vitit 2018, Veseli i referoi Gjykatës Kushtetuese të Republikës së Kosovës, një amendament të Kushtetutës, të propozuar nga 80 deputetë të Parlamentit të Kosovës, duke kërkuar nga Gjykata të bëjë vlerësim paraprak nëse amendamenti i propozuar zvogëlon ndonjë nga të drejtat dhe liritë e garantuara me Kapitullin II të Kushtetutës.

Amendamenti i propozuar parashikon që të shtohet një paragraf i ri pas paragrafit 8 të nenit 22 [Zbatimi i drejtpërdrejtë i Marrëveshjeve dhe Instrumenteve Ndërkombëtare] të Kushtetutës, respektivisht të shtohet edhe paragrafi 9, si në vijim:

“(9) Konventa e Këshillit të Evropës për parandalimin dhe luftimin e dhunës kundër grave dhe dhunës në familje”.

Siç thuhet në vendimin e Gjykatës Kushtetuese, propozuesit e amendamentit pretendojnë se amendamenti i propozuar “përcakton standarde të rëndësishme në fushën e dhunës kundër grave dhe dhunës në familje dhe ka për qëllim mbrojtjen e grave nga të gjitha  format e dhunës, dhe parandalimi, ndjekja penale dhe eliminimi i dhunës kundër grave dhe dhunës në familje.”

Gjykata konstatoi se formulimi i amendamentit të propozuar nuk zvogëlon asnjë nga të drejtat dhe liritë e përcaktuara në Kapitullin II të Kushtetutës.

“Për më tepër, ajo vetëm i avancon dhe i zhvillon këto të drejta”, thuhet në vendimin e Gjykatës Kushtetuese.