“Dhuna në komisariat”/ Deputetët e akuzuar: Ja si na sulmuan drejtuesit e dehur të policisë!

Pas njoftimit zyrtar se 6 Ish-Deputetë të opozitës janë proceduar dje nga Prokuroria e Rrethit Gjyqësor Tiranë për veprën penale të kundërshtimit të punonjësit të policisë, ngjarje kjo e ndodhur më datën 16 shkurt, sot deputetët e akuzuar kanë sqaruar për atë se çfarë ka ndodhur realisht se kush është dhunuar natën e 16 Shkurtit.

Ish-Deputeti Enkelejd Alibeaj, në atë kohë Nënkryetar i Komisionit të Sigurisë përveç se deputet, sqaron se si u trajtuan jo vetëm mbi 50 të shoqëruarit pjesëmarrës në protesta por edhe vetë deputetët nga drejtuesit e dehur të policisë, duke i ilustruar dëshmitë edhe me pamje filmime:   

“Ka qënë data 16 shkurt, protesta e parë e organizuar nga ana e opozitës së bashkuar me qytetarët përpara Kryeministrisë dhe menjëherë pas saj, ka ndodhur një valë e gjatë e fortë shoqërimesh, arrestimesh, dhunë ndaj qytetarëve, pjesëmarrësve në protestë. Mbi 50 ishin të shoqëruar atë ditë.

Ne morëm të dhëna se shumë prej pjesëmarrësve iu nënshtruan dhunës e terrorit. Në këtë situatë, një grup deputetësh, në atë kohë edhe Nënkryetar i Komisionit të Sigurisë – komisionit parlamentar që ka detyrë, monitorimin e Policisë së Shtetit, shkuam pranë Drejtorisë së Policisë së Tiranës sipas të drejtave dhe detyrimeve që kanë deputetët për të marrë informacion mbi atë çfarë policia ishte duke ushtruar ndaj qytetarëve.

Dhe të penguar totalisht nga funksionarët e Policisë si ata në hyrje dhe ata në kupolë, u pengua e drejta jonë për të marrë informacion dhe pse jo, edhe për të ndaluar, në fakt ky ishte qëllimi ynë, për të ndaluar valën e dhunës, terrorit, shoqërimeve, arrestimeve, që Policia po bënte atë mbrëmje në 16 shkurt.

U penguam atë mbrëmje kur Kushtetuta i jep deputetit përparësi të pritet  nga ana e strukturave policore dhe ligjin që jep si detyrim t’i presë me përparësi deputetët.

U penguam jo më pak sesa një orë dhe në kushtet kur ndodhi kjo dhe vazhdoi vala e shoqërimeve dhe arrestimeve, shkuam me përpjekje në zyrën e Drejtorit të Policisë. Çdokush mund të mendojë se në atë kohë ishin të impenjuar me detyra të tjera, por për çudinë tonë e jo vetëm tonën pamë që detyra e vetme që Drejtori i  Policisë së Tiranës, Drejtori i Përgjithshëm i Policisë, Nëndrejtorët e Policisë, prokurorët ishin të impenjuar nga avujt e alkoolit!

Në një kohë kur qytetarët dhunoheshin, goditeshin, arrestoheshin, këta funksionarë që kishin detyrë t’u krijonin kushtet deputetëve të merrnin informacion, ishin sheshuar dhe mbytur nën avujt e alkolit. Siç i shihni në pamje!

 E jo vetëm kaq, por aty në zyrat kryesore të shtetit, të Policisë së Tiranës,  u ndodhëm përballë një agresioni të personave të dehur nga avujt nga alkoolit, por ndoshta dhe nga euforia e dhunës policore dhe shtypjes së kokës së qytetarëve dhe deputetëve të opozitës! 

Pamjet tregojnë fare qartë se si Drejtori i Përgjithshëm i Policisë, për një akt të thjeshtë që bën kushdo sot, filmon e dokumenton atë që po ndodhte, agreson deputetin Strazimiri; se si një Nëndrejtor i Policisë nën avujt e alkoolit, vendos edhe dorën për të kapur koburen, nuk e di se kujt do t’ia drejtonte, prej deputetëve! 

Kjo ishte ajo që ndodhi. Menjëhërë pas atij momenti, ne depozituam një kallëzim penal si deputetë!”

Noka: Unë largova policin, që i kishte futur thonjtë në fyt, kolegut Strazimiri!

Ish-Deputeti Flamur Noka, ka sqaruar rrrethanat se çfarë ndodhi dhe pse ai dhe kolegët e tij janë sot  nën hetim nga Prokuroria, në një kohë kur Policia ka ushtruar dhunë ndaj tyre në 16 shkurt.

“Ne, jemi përballë një tentative kërcënimi të deputetëve të opozitës nga qeveria. Nuk ka bërë vaki kurrë që në demokraci, punonjësit apo zyrtarët e lartë të Policisë të dhunojnë deputetë në krye të detyrës.

Janë munduar të fshijnë materiale filmike, por aty shihni në një moment që ka shpërndarë Policia politike dhe prokuroria politike ku punonjësi i Policisë ndalon fizikisht deputetët, i shtyn, që nuk lejohet se kanë deputet, por i kanë futur thonjtë në fyt kologut Strazimiri që është vizituar edhe tek mjeku për dhunën. Unë kam ndërhyrë për të larguar punonjësin e Policisë që i ka futur thonjtë në fyt kolegut Strazimiri. Kjo është ajo që kam bërë unë. Thjesht kam larguar një punonjës Policie, që kapte për fyti deputetët. Ky është një rast i paprecedentë. Kjo është çështja për të cilën ne kemi bërë kallëzimin penal.” 

Ndryshe, hetimi ndaj 6 deputetëve opozitar ka nisur pas protestës së 16 shkurtit 2019, ku thuhet se janë futur me forcë në ambientet e Drejtorisë së Policisë së Tiranës, duket shtyrë punonjësit e Policisë. Bëhet fjalë për deputetët Enkelejd Alibeaj, Flamur Noka, Gent Strazimi, Klevis Balliu, Xhemal Gjunkshi dhe Anton Frrokaj, që sipas organizat të akuzës janë futur me dhunë në ambientet e Drejtorisë së Policisë.

Prokuroria pranë Gjykatës së Shkallës së Parë Tiranë, pasi ka kryer hetimet, thekson se ka ngritur akuzë për veprën penale të “Kundërshtim i punonjësit të Policisë”, kryer me përdorim të dhunës dhe në bashkëpunim.