Dhunën Edi Rama nuk e solli te Teatri…
nga Agim Popoci
Mëngjesi i 24 Korrikut filloi me dhunën policore ndaj pjesëtarëve të Aleancës për Mbrojtjen e Teatrit duke filluar kështu dhe aktin e fundit të dramës me regji të Edi Ramës, “Teatri Kombëtar”!
Mbështetësit e teatrit mbetën të habitur se si policia ushtron dhunë ndaj artistëve, pse është e domosdoshme kjo dhunë dhe filluan ti bëjnë thirrje qytetarëve ti bashkohen artistëve që të ndalojnë dhunën dhe shembjen e asaj që është Kombëtare, Teatrin.
Por ashtu si edhe vite më parë, policia nuk erdhi në vendin e krimit, ajo është autore e krimit në vijimësi kundër Kombit Shqiptar që sot, kur është instaluar, takohet edhe me artistët. Dhe, sot, veprimi i regjimit të Edi Ramës nuk është dhunë ndaj artistëve dhe Teatrit Kombëtar, nuk quhet dhunë por turp i Kombit Shqiptar!
Kur vuri dorë mbi Kombin Shqiptar dhe e ndau në dysh me traun në Rrugën e Kombit, të gjithë heshtën. Qindra kuksianë që hallin e kishin te dera e shtëpisë, u ngritën kundër fillimit të dhunës që po instalonte Edi Rama kundër Kombit Shqiptar, por mbetën jetim.
Të gjithë ata që e kishin larg pragut të shtëpisë, ndonëse kemi të bëjmë me veprën më të madhe kombëtare që lidhë Kombin Shqiptar, nuk e konsideruan problem të tyre.
Kuksianët që i dolën përballë kësaj dhune të Edi Ramës u dergjën në burgje, iu terrorizuan familjet, Kukësi u pushtua nga policët dhe të gjithë heshtën, si artistët ashtu edhe opozita. Protesta Kombëtare para traut të Edi Ramës që ndau Kombin Shqiptar u braktis nga të gjithë, ca i bleu konçesionari, ca i kërcënoi Edi Rama, kishte edhe nga ata që u gëzuan, por i vetmi që korri fitore ishte Kryeministri i Shqipërisë, Edi Rama.
Dhe, kur vendosi traun, kur u bindë se ky komb është po ai që iu gjunjëzua Enver Hoxhës, vazhdoi me dhunën, kudo: në rrugë, në punë, në shtëpi e madje edhe në spital, deri sa i erdhi radha edhe Teatrit Kombëtar!
Sot aktorët dhe mbështetësit e Teatrit Kombëtar çuditen pse Edi Rama përdor dhunën dhe tërheqë zvarrë aktorët! Por Edi Rama nuk e solli dhunën te Teatri Kombëtar, metastaza e saj arriti të zgjerohet nga trau në Rrugën e Kombit dhe sot ajo preku dhe Teatrin.
Sot edhe pse është vonë, dhuna e Edi Ramës duhet të ndërpritet para se ti nënshtrohet një kimioterapie; Dhe, ashtu siç nuk bëhej tek trau i Rrugës së Kombit vetëm me kuksianë, sot nuk bëhet vetëm me artistë. Dhunën e Edi Ramës shqiptarët mund ta ndalojnë vetëm të bashkuar, ndryshe, ajo do të vazhdoj të kalbëzoj shtetin, kombin dhe gjithçka që është shqiptare!
