Dhunohet Memoriali i martirëve të Masakrës komuniste të Matjanit

Në fushatën e revanshit komunist në Shqipëri, këto ditë është dhunuar një tjetër memorial kushtuar martirëve antikomunistë. Janë prerë selvitë e mbjella dy vjet më parë në vendin e Masakrës komuniste në Matjan të Lushnjes, nga familjarët e martirëve dhe Shoqata Antikomuniste e të Përndjekurve Politikë, veprim kriminal pas të cilit ka reaguar ashpër shoqata SHAPP duke e konsideruar si një fushatë revanshi të qeverisë, të nderimit të autorëve të krimeve të komunizmit dhe simboleve politike e ideologjike komuniste!

“Dhunimi i memorialit të martirëve të vrarë nga Brigada e parë komuniste e drejtuar nga Mehmet Shehu dhe shefi i tij serb, Dushan Mugosha, vjen pak ditë pas heqjes me vendim gjykate, të emrit të kriminelit komunist, Mehmet Shehu, nga një rrugë në qytetin e Ballshit, gjë që na bën të dyshojmë se ky është i krim i planifikuar me prapavijë e mbështetje të qartë politike,” thekson kryetar i  Shoqatës Antikomuniste të Përndjekurve Politikë të Shqipërisë, Nebil Çika, pas një vale dhunimesh të memorialeve të martirëve antikomunist duke konstatuar:  

“75 vjetori i pushtimit komunist të Shqipërisë ka shënuar një valë dhunimesh të memorialeve kushtuar martirëve antikomunistë dhe viktimave të komunizmit në të gjithë vendin. Ndërkohë qeveria dhe pushteti lokal nën kontrollin e komunistëve kanë organizuar një fushatë revanshi të nderimit të autorëve të krimeve të komunizmit dhe simboleve politike e ideologjike komuniste!”

Shoqata Antikomuniste e të Përndjekurve Politikë të Shqipërisë e indinjuar dhe e revoltuar nga këto dhunime, i kërkon qeverisë të ndalë revanshin e nderimit të diktaturës komuniste që frymëzojnë dhunimet e memorialeve antikomuniste nga militantët e sajë e dhe institucioneve të zbatimit të ligjit, të gjejnë e të ndëshkojnë autorët e këtyre krimeve.

Ndryshe, në këtë vend, në vitin 1943 forcat komuniste të komanduara nga Mehmet Shehu dhe Dushan Mugosha pushkatuan 72 nacionalistë të zonës, të nderuar me titullin e lartë “Martirë të Demokracisë” nga Presidenti i Republikës .