Dhunuesi i turistëve spanjollë, para gjykatës: Nuk kam prekur njeri me dorë…

“Arrest me Burg” ishte masa e sigurisë që dha sot Gjykata në Vlorë për shtetasin Mihal Kokëdhima, i arrestuar pasi tre ditë parë goditi me sende të forta furgonin e një grupi spanjollësh që kishin drekuar në restorantin e tij në Porto Palermo.

Pas pakënaqësisë së turistëve për shërbimin, Kokëdhima shpërtheu në dhunë ndaj tyre. Ai përfaqësohej në seancë nga dy avokatë, ndërsa gjyqtari i çështjes ishte Esmerilda Habilaj.

“Më morën zvarrë me makinë. Ç’është kjo punë nuk kam prekur njeri me dorë. Ku kanë faktet që i preka me dorë. Më rrëzuan në Qeparo, nga makina. Unë nuk e theva xhamin për t’i dëmtuar por për t’u mbajtur.

Unë u mora targën, telefonova policinë. Ata futën marshin të më shtypnin, dhe unë u hodha ne kriskot. Kam dy fëmijë në shkolle në Gjermani. Ne dy muaj punojmë. Më lini të punoj,” është shprehur Mihal Kokëdhima.

Avokatët mbrojtës theksuan se asnjë nga akuzat nuk qëndron për ta mbajtur prapa hekurave dhe kërkuan masë sigurie më të butë. Duke ofruar garanci pasurore deri në 3 mijë euro avokatët shtuan se Mihal Kokëdhima nuk paraqet rrezikshmëri shoqërore.

Në fund, gjykata vendosi masën e sigurisë “arrest me burg”.

Mihal Kokëdhima akuzohet për “Kanosje”, “Dëmtime të tjera me dashje” dhe “Shkatërrimi i pronës”.