Dhurata e Ramës për 2021, PD: Edhe 2000 euro taksa për bizneset e rrënuara nga kriza dhe pandemia!

Që nga 1 janari i vitit të ardhshëm, bizneset dhe sipërmarrjet në Shqipëri do të paguajnë afërsisht 2000 euro në vit shtesë. Gënjeshtrën e Kryeministrit Edi Rama se nga janari 2021 bizneset e vogla nuk do të paguajnë asnjë taksë, sot e nxjerr zbuluar Partia Demokratike përmes Ish-Deputetes Jorida Tabaku duke konfirmuar taksën e fshehur të Fiskalizimit, përveç taksave dhe tarifave lokale te 10 fishuara.

“Kjo kosto ekstra për bizneset e rrënuara nga kriza dhe pandemia, është ‘dhurata’ e re e Edi Ramës për klientët e tij dhe i ka kushtuar xhepave të shqiptarëve 16 mln euro,” thekson Jorida Tabaku duke shtuar se bizneset e mesme dhe të vogla do të rëndohen dhe më tej për të paguar këtë konçension të ri, dhënë një kompanie kroate si qokë personale e Ramës dhe që do të paguhet nga xhepat e shqiptarëve.

“Fiskalizimi përfshin një shtesë të kostove të internetit me mesatarisht 130 euro në vit, ndërkohë që vlera e përditësimit të sistemeve financiare shkon mesatarisht deri në 500 euro në vit nëse biznesi zotëron një llogari, pra një të punësuar apo vetëpunësuar, sqaron Ish-Deputetja e Partisë Demokratike në reagimin e saj përmes rrjetit social Facebook duke saktësuar se të gjitha këto përllogaritje kryhen pa pasur parasysh çmimet që do të ofrojnë kompanitë që do të merren me programin e fiskalizimit.

Por burimet nga sipërmarrjet që kanë kryer disa llogari personale flasin për një kosto të faturave të fiskalizimit që shkojnë mbi 650 euro deri në 1626 euro/vit.

“Shkurt dhe qartë, gënjeshtrën e Ramës se që nga janari 2021 bizneset e vogla nuk do të paguajnë asnjë taksë e nxjerr zbuluar taksa e fshehur e Fiskalizimit, përveç taksave dhe tarifave lokale te 10 fishuara. Një barrë e re fiskale që i vendoset padrejtësisht nga dy herë bizneseve të vogla, bizneseve të mesme dhe natyrisht dhe bizneseve të mëdha,” thekson Tabaku, duke shtuar:

“Boll më me gënjeshtra! Boll më me sjellje arrogante që vetëm i marrin frymën biznesit sidomos në këto kohë pandemie. “

Në fund, Ish-Deputetja e PD, Jorida Tabaku, duke vlerësuar se Shqipëria ka nevojë për ndryshim, ka nevojë për frymëmarrje, për një ekonomi tregu, për incentiva karshi sipërmarrjes, përfundon:

“Ne do të ndahemi një herë e mirë nga keqqeverisja dhe abuzimi me taksat e shqiptarëve!”