Dialog me parime, Kurti: Takimi i radhës varet nga Brukseli!

Kryeministri në detyrë, Albin Kurti, tha se kalendari i takimeve të ardhshme me Serbinë varet nga Brukseli dhe do të jetë ai që do të përfaqësojë Kosovën në dialog, pasi ka edhe një vendim të gjykatës që thotë kryeministri përfaqëson vendin ne dialog.

“Unë jam në kontakt të rregullt me përfaqësuesin e BE z. Miroslav Lajçak, ai natyrisht që është duke përgatitur fillimin e dialogut. Ne kërkojmë që ky dialog të jetë me parime dhe i përgatitur, i organizuar mirë. Jemi gati, kemi përvojë, do t’i mbrojmë interesat e shtetit tonë dhe do ta përfaqësojmë Republikën e Kosovës ashtu siç e thotë Kushtetuta, ashtu siç e thonë ligjet tona dhe ashtu siç na njeh populli i Kosovës,” tha Kryeministri Albin Kurti duke shtuar:

“Pra, varet prej Brukselit kalendari i dialogut të ardhshëm dhe në bazë të Kushtetutës të Republikës së Kosovës dhe aktgjykimit nga viti i kaluar Kosovën e përfaqëson kryeministri i saj.”

Ndryshe, përfaqësuesi i Bashkimit Evropian, Miroslav Lajçak, tha se dialogu mes Kosovës dhe Serbisë do të fillojë së shpejti.