Dialogu Kosovë-Serbi, Shqipëria nuk mbështet Deklaratën e BE: Nuk pasqyron realitetin!

Për herë të parë Shqipëria zyrtarisht nuk është në linjë me Bashkimin Evropian, duke mos dhënë mbështetje për Deklaratën e fundit të bërë më 19 Shtator, lidhur me dialogun Prishtinë-Beograd.

“BE-ja mbetet po aq e shqetësuar për mungesën e progresit nga të dyja palët për de-përshkallëzimin e tensioneve në veri të Kosovës, disa muaj pas shpërthimit të fundit të dhunës që solli lëndime të qytetarëve, trupave të KFOR-it, policisë dhe përfaqësuesve të mediave, disa me pasoja të rënda dhe të përhershme,” thuhet në Deklaratën e BE të 19 shtatorit, për të cilën pjesë të Deklaratës, Tirana zyrtare nuk e mbështeti, pasi BE e vë në pozita të barabarta përgjegjësie Kosovën dhe Serbinë dhe nuk ka reflektuar në të qëndrimin për ngjarjet e 24 Shtatorit, kur një grup i armatosur paramilitarësh serbë sulmuan policinë e Kosovës dhe vranë një rreshter të saj në krye të detyrës.

Ndryshe, kjo e mërkurë ishte dita e fundit e afatit brenda të cilit Shqipëria duhet të jepte ose jo mbështetjen për deklaratën e BE-së. Por mungesa e përditësimit të deklaratës pas ngjarjeve të 24 Shtatorit solli moslinjëzimin e vendit tonë me BE-në. Sipas burimeve, qeveria argumenton se gjatë këtyre ditëve, BE ka pasur mundësinë dhe kohën për të përditësuar atë deklaratë, duke u shprehur qartë se përgjegjësia për ngjarjet në veri nuk është e Kosovës. Burimet thonë se pala shqiptare mbetet të pritje të një deklarate të re nga Brukseli zyrtar. Për palën shqiptare, deri sa të ketë një qëndrim të ri lidhur me ngjarjen e së dielës, nuk mund të mbështetet diçka që nuk reflekton realitetin.

Ky është qëndrimi i parë Shqipërisë, në kundërshtim me linjën e BE-së, e cila bën njëlloj përgjegjëse për dështimin e dialogut si Kosovën ashtu edhe Serbinë.