Dialogu Kosovë-Serbi, skeptikë për sukses nën mandatin e Lajçakut
Vazhdimin e mandatit edhe për dy vjet për Të dërguarin e Posaçëm të BE-së për dialogun Kosovë-Serbi, Miroslav Lajçak, analistët në Kosovë nuk e shohin me optimizëm. Sipas tyre, ai nuk do të sjellë ndonjë risi të dukshme për sa i përket procesit të dialogut, pasi siç theksojnë ata, deri tani nuk ka pasur sukses. Ndërkaq, takimi i planifikuar të mbahet sot në Bruksel ndërmjet Kryeministrit të Kosovës, Albin Kurti, dhe Presidentit të Serbisë, Aleksandar Vuçiç, ka dështuar.
Takimi i cili ishte planifikuar të mbahej sot në Bruksel ndërmjet Kryeministrit të Kosovës, Albin Kurti, dhe Presidentit serb, Aleksandër Vuçiç, ka dështuar për shkak, siç thuhet se presidenti serb i ka dhënë përparësi takimit me presidentin e Egjiptit.
Ndërkohë, Të dërguarit të Posaçëm të BE-së për dialogun Kosovë- Serbi, Miroslav Lajçak, i është vazhduar mandati edhe për dy vjet, derisa analistët në Kosovë e shohin si jo të suksesshme punën e tij të deritashme, pasi siç thonë, rezultatet kanë qenë minore.
Njohësi i çështjeve politike, Shqiprim Pula, tha për Radio Kosovën se angazhimi i Të dërguarit të Posaçëm Miroslav Lajçak për dialogun Kosovë-Serbi nuk ka qenë i duhuri, për arsye se ai vjen nga shteti sllovak që nuk e ka njohur pavarësinë e Kosovës. Ndërsa, theksoi se gjatë mandatit të tij të deritashëm nuk ka pasur ndonjë rezultat dhe se ai vazhdon të jetë joneutral karshi këtij dialogu.
“Riemërimi i tij nuk sjell ndonjë risi të dukshme. Përmbajtësisht nuk do të ketë ndonjë zhvillim madhor. E vetmja gjë është që ai do të respektojë aspektin procedural e protokollar për sa u takon ftesave të dërguara për personat zyrtarë të të dyja shteteve për të vazhduar tutje me procesin e dialogut,” tha Pula.
Profesori universitar, Dorajet Imeri, tha për Radio Kosovën se procesi i dialogut Kosovë-Serbi mund të vazhdojë pafundësisht nëse nuk përfshihen edhe Shtetet e Bashkuara të Amerikës. Ndërkaq, për rezultatet e deri tanishme të këtij dialogu përmes Të dërguarit të Posaçëm Lajçak, Imeri tha se ato tregojnë për pamundësinë që BE mund të prodhojë një zgjidhje të qëndrueshme për palët.
“Natyrshëm që edhe në dy vitet e ardhshme nuk pres ndonjë ndryshim të madh, për aq kohë sa janë akterët e njëjtë dhe sa kohë që Bashkimi Evropian nuk ndërmerr veprime të tjera. E nëse eventualisht Shtetet e Bashkuara të Amerikës nuk marrin pjesë në mënyrë aktive në këtë proces, nuk mund të shoh që edhe në dy vitet e ardhshme të ketë një zgjidhje të pranueshme për palët”, ka thënë Imeri.
Sipas analistëve, bisedimet ndërmjet Kosovës e Serbisë mund të ri-fillojnë në vjeshtën e këtij viti, ndërsa theksojnë se dialogu duhet të vazhdojë me temat të cilat kanë mbetur të hapura. Por, ata nuk presin ndonjë rezultat gjatë këtij viti për sa i takon përmbushjes së detyrimeve që u takojnë të dy shteteve. Analistët ripërsëritën se tashmë dihet që Serbia është ajo që ka zvarritur procesin e dialogut dhe nuk po gjen vullnetin politik për të bërë një kthesë, qoftë historike, për të përmbyllur çështjen e statusit të Kosovës, pasi kjo nënkupton njohjen e ndërsjellë.
