Dialogut me Serbinë i duhet konsensus i përgjithshëm politik

Dialogut me Serbinë i duhet konsensus i përgjithshëm politik. Kështu vlerësojnë njohës të rrethanave politike në Kosovë, mirëpo, presidenti Hashim Thaçi po përballet me bojkot nga opozita, e cila nuk e mbështet atë si udhëheqës të bisedimeve. Në këtë mënyrë, arritja e një konsensusi në mes të subjekteve politike për këtë çështje, pothuajse konsiderohet e pamundur.

Të rreshtuar në një krah, partitë opozitare, po e kundërshtojnë kategorikisht përfaqësimin e Kosovës në dialog me Serbinë nga ana e presidentit Hashim Thaçi. Konsensusi për këtë se kush duhet t`i udhëheq bisedimet në Bruksel nuk është arritur as në tryezat e subjekteve politike, të orgainizuara radhazi, madje as në debatin parlamentar që u thirr për këtë çështje. Analisti Blerim Burjani, i tha Radio Kosovës se i tërë procesi i dialogut është dashur të shkojë përmes Kuvendit që nga fillimi i tij.

“Nuk ka debat kur të kryhen të gjtha gjërat, debatet është dashur të organizohen shumë më herët. Kuvendi i Kosovës është dashur që të caktojë një grup dhe të merren vesh të gjitha temat e takimit. Nëse duhej strategji atëherë le të aprovohet ajo strategji dhe procesi është dashur të kalojë përmes Kuvendit që nga fillimi që së paku të ketë një minimum të transparencës”.

Koalicioni aktual i udhëhequr nga PDK, AAK dhe Nisma, konsiderohet i pafuqishëm edhe në Kuvend. Kjo për shkak se ky koalicion nuk i ka votat e mjaftueshme për ta kaluar marrëveshjen, nëse ajo arrihet mes Kosovës dhe Serbisë. Lulzim Peci, drejtor ekzekutiv i KIPRED-it, thotë për Radio Kosovën se nëse faktori politik nuk arrin të gjejë një konsensus rreth çështjes së dialogut dhe nëse marrëveshja e arritur në Bruksel nuk kalon në Kuvend, atëherë kjo do të ketë pasoja për vendin.

“Nëse marrëveshja e mundshme nuk ratifikohet në Kuvend duhet të jemi të bindur se do të ketë pasoja për Kosovën. Për këtë arsye duhet një pjekuri e skenës politike që të jetë e vetëdijshme për momentin e tanishëm historik të Kosovës dhe mos të lejojnë që për shkak të inateve personale shteti të merr një drejtim të pa lakmueshëm për të ardhmen e tij”.

Sidoqoftë, dialogu mes Kosovës dhe Serbisë, tashmë ka hyrë në fazën finale të tij. BE-ja, po mundohet që para zgjedhjeve në Parlamentin Evropian, kjo çështje të përfundoj me një marrëveshje ligjërisht të detyrueshme për të dyja palët që, sipas presidentit Thaçi, do të rezultonte me njohjen reciproke dhe hapjen e perspektivës evropiane për të dyja shtetet.