Diktatori dhe Rama si kopje zhgarravinë e tij

Më nostalgjikët e diktatorit që vazhdojnë dhe e nderojnë në këtë ditë, shpesh kam qeshur me tallje duke i parë si karikatura-hije të atij regjimi që e rrënoi këtë vend dhe dhunoi e shkatërroi shqiptaret në çdo aspekt.

Kam ndjekur me përbuzje ato media që duke përfituar nga fakti që rinia e sotme nuk e ka jetuar atë kohë të ndyrë, përpiqen ta glorifikojnë duke e paraqitur si një kohë që kishte të metat e veta, por kishte dhe të mira.

Por në fakt as të parët e as të dytët nuk do i konsideroja si rrezik se as të paret e as te dytët nuk e ringjallin diktatorin.

Rreziku është ndërkaq me real se kurrë i personifikuar tek Edvin Rama.

Ngjashmëritë me diktatorin komunist janë të frikshme.

Si Hoxha ashtu dhe Rama rezultojnë dy dështak në çdo aspekt të jetës së tyre deri në momentin që të tretë i zbulojnë dhe ju japin pushtet politik.

Hoxha u ‘zbulua’ dhe u përdor nga komunistët jugosllavë. Rama nga Soros.

Perversiteti i dështakëve me ambicie dhe ego që kalonin mundësitë dhe aftësitë e tyre ishin tiparet që paradoksalisht gjeten jugosllavët tek Hoxha dhe Soros tek Rama.

Kjo sepse ata kuptuan që monstra të tilla janë gati të bëjnë gjithçka për të realizuar ambiciet e tyre, të shkelin e të përdorin dhe vetë familjet e tyre, të mos kenë skrupuj përpara asnjë lloj amoraliteti për të kapur majën e dëshiruar të pushtetit. Nga ana tjetër, këta arrogantë më të dobëtit , janë shërbëtorë të mirë për padronët e tyre.

Ngjashmëritë në karakter për fat të keq po pasqyrohen gati pikë për pikë dhe në komportimin e të dyve edhe pse Rama ngjan si një kopje zhgarravine e diktatorit.

Po çfarë bëri diktatori e çfarë po bën Rama?

Diktatori ju rrëmbeu gjithçka, sekuestroi çdo pasuri të shqiptareve, të luajtshme dhe të paluajtshme dhe u bë vetë pronar i gjithë vendit dhe pasurive.

Rama po bën të njëjtën gjë me taksat dhe PPP e tij , grabit paratë e shqiptareve dhe ju a kalon oligarkëve që në fund i çojnë po në xhepin e tij. Rrëmben me ligje të posaçme prona publike dhe private. I jep monopolet e bizneseve me fitimprurëse të vëllait dhe familjareve. Vë nën kontroll fitimet e çdo aktiviteti kriminal…

Me pak fjalë dhe ky po kërkon të bëhet pronar i vetëm i Shqipërisë dhe shqiptarëve.

Për të kontrolluar plotësisht pushtetin, Hoxha sajoi ‘komplote’ të armiqve të brendshëm e të jashtëm dhe eliminoi kundërshtarët politik që në fillim të pushtetit të tij , nga ata pak deputetë që arritën të dalin në zgjedhjet e para dhe të vetme ku u lejuan kandidatë alternativë me komunistët e deri tek klerikët e intelektualët që konsideroheshin si kundërshtarë. Futja e armëve nëpër objektet e kultit për të fajësuar e burgosur klerikët, bomba në ambasade, sajesat me dëshmitarë të rremë…

Të njëjtën gjë po bën sot Rama; flet për ‘komplote’ te opozitës për marrjen e pushtetit. Sajon dëshmitarë të rremë duke i kërcënuar apo joshur. Shpall opozitën armike .

Diktatori eliminoi gjithë shtypin alternativ dhe e zëvendësoi me ‘Zërin e Popullit’.

Rama e bleu pjesën më të madhe të mediave. Ata që nuk i bleu dot, i kërcënoi dhe një pjese ua mbylli gojën. Tani po kërkon të mbyllë të gjitha ato media e portale që as nuk i joshi e as nuk i trembi dot për të lënë në fund vetëm ERTV.

Diktatori dënonte me ligjin e agjitacion e propagandës të gjithë ata që guxonin të flisnin kundër rrëgjimit te tij.

Rama kërkon ti dënoje me ligjin antishpifje.

Diktatori i ktheu institucionet e ruajtjes së rendit dhe sigurisë në mjete represioni dhe dhunë ndaj kundërshtareve.

Rama këto institucione përveç se i ka vënë në funksion të krimit, i urdhëron publikisht të mbledhin vota për të në fushata dhe të luftojnë opozitën me çdo mënyre.

Diktatori eliminoi drejtësinë duke përdorur hetuesinë, prokurorinë dhe gjykatat si armë ndaj kundërshtarëve te tij.

Rama ka rrëmbyer prokurorinë dhe ka eliminuar gjykatat deri sa ti kontrollojë plotësisht edhe gjyqtarët me vetingun e tij.

Diktatori i ktheu zgjedhjet në farsë dhe eliminoi pluralizmin dhe demokracinë .

Rama i ka kthyer zgjedhjet në farsë. Po e lejuam nuk e ka problem dhe të burgosë gjithë kundërshtarët e të shpalle me Kushtetutë, ‘rilindjen’ si e vetmja forcë politike në Shqipëri.

Të paret tanë e lejuan Hoxhën ta kthente Shqipërinë në ferr. Do ta lejojmë Ramën të bëj të njëjtën gjë? Por kjo është pyetje për te gjithë, jo vetëm për opozitën. Është e lehtë të bësh me përgjegjësi PD pa dhënë asnjë kontribut vetë. Ca më shumë ata që bëjnë opozitën e opozitës. Gjithë ditën vetëm sulmojnë PD gjoja sikur janë të shqetësuar se pse PD nuk e rrëzon Ramën e në fakt i bëjnë shërbimin më të mirë Ramës duke e konsideruar PD të pafuqishme apo ca më keq si pjesë të tepsisë së Ramës. Këtë politike bën dhe Rama gjithë ditën. Duke qenë koshient se është i nxirë nga të gjitha anët, kërkon t’ju fusë në kokë shqiptarëve se të gjithë të zi jemi, atëherë pse të protestojnë e pse ta rrëzojnë Ramën shqiptaret…?

Një fjalë të fundit për shërbëtorët: Vazhdoni ta mbështesni Ramën, po kujtoni që diktatori, pasi eliminoi kundërshtarët, ju hëngri kokat dhe miqve e pasuesve te tij…

*Nënkryetar dhe deputet i PD