“Dinari serb”, Lajçak: Ka përafrim! Bislimi: Ne u pajtuam me propozimin e BE, Serbia kërkoi kohë!

Takimi për gjetjen e një zgjidhjeje për çështjen e dinarit serb në Bruksel përfundoi pa sukses, për të dërguarin e Bashkimit Evropian për dialogun Kosovë-Serbi, Miroslav Lajçak, kishte përafrim ndërsa kryenegociatori kosovar Besnik Bislimi tha se Kosova ishte dakord me propozimin e BE-së por Serbia kërkoi kohë

“Mirëprita një tjetër takim me dy kryenegociatorët për të gjetur një zgjidhje të përkohshme për personat e prekur nga rregullorja e BQK-së. Ia arritëm t’i përafrojmë disa dallime nga propozimet e palëve. Kam plan që së shpejti ta vazhdojmë diskutimet tona bazuar në idetë e BE-së për kompromis,” tha Miroslav Lajçak pas takimit përmes rrjetit social X duke paralajmëruar takimin e radhës.

Nërsa Zv/Kryeministri i Kosovës, Besnik Bislimi, pas takimi të përbashkët me kryenegociatorin serb, Petar Petkoviç, tha se pala kosovare është pajtuar me propozimin e emisarit të BE-së, sa i përket çështjes së dinarit, por pala serbe ka kërkuar kohë shtesë.

“Duke parë pamundësinë e arritjes së një kompromisi, Lajçak ka nxjerrë një propozim të konsoliduar për të cilën ne besojmë se është konstruktiv dhe në rrugën e duhur për të gjetur zgjidhje, e cila më së shumti i shkon për shtati qytetarëve serb në Kosovë. Pala serbe nuk ka qenë e gatshme të reflektojë këtë propozim dhe ka kërkuar kohë shtesë. Takimi i radhës pritet të mbahet pas dy javëve në Bruksel,” tha Bislimi duke shtuar se takimi i sotëm është caktuar me idenë që palët të reflektojnë ndërkaq pala serbe ka kërkuar më shumë kohë për arsye se nuk ka pasur kompetenca në vendimmarrje.

Derisa pala kosovare ka diskutuar për opsionet se si serbët e Kosovës mund ta marrin mbështetjen financiare edhe më tej nga Serbia, tha Bislimi, pala serbe ka punuar si avokat i Bankës Kursimore të Postës serbe.

 “Atyre iu është bërë e qartë që takimi i radhës mund të mbahet vetëm nëse ata janë të gatshëm të vijnë me ide për kompromis. Edhe sot kemi pasur dallime të mëdha, përderisa pala kosovare ka diskutuar për opsionet se si qytetarët serb mund të marrin mbështetjen financiare edhe më tej nga Serbia. Pala serbe ka funksionuar si avokate e ‘Postanska bankës’ dhe gjithë kohën ka diskutuar se si të rregullohet licencimi i kësaj banke, e cila nuk është as kompetente, as në interes të palëve të involvuara,” tha Bislimi pas takimit duke paralajmëruar takimin e radhës pas dy javësh në Bruksel ndërsa përfundon:

“Ky takim nuk ka qenë as i fundit, as i pari për dinarin. Takimi është për të trajtuar modelet me të cilat Serbia mund të vazhdojë dërgimin e mbështetjes financiare për serbët e Kosovës, brenda rregullores së Bankës Qendrore të Kosovës. Rregullorja nuk e përmend dinarin, rrjedhimisht nuk ka as diskutime për të.”