“Diplo 2025”, mesazhi i Ambasadorit BE: Të rinjve në Shqipëri, që mbeten të zhgënjyer dhe të ardhmen…

Të rinjtë janë ata që mund të bëjnë të pamundurën që Shqipëria të bëhet shtet anëtar i Bashkimit Evropian, tha Ambasadori i delegacionit të BE në Tiranë, Silvio Gonzato, duke fol në konferencën diplomatike “Diplo 2025” sot në Tiranë, ndërsa kishte mesazh të veçantë për të rinjtë që mbeten të zhgënjyer dhe e shohin të ardhmen e tyre jashtë Shqipërisë dhe jo për Edi Ramën dhe mazhorancën e tij që premton në çdo mexhlis këtë anëtarësim në familjen evropiane.

“Të jesh përfaqësues i BE-së këtu në Shqipëri është një përvojë fantastike. E ndjej veten si pjesë të kësaj përpjekjeje. Mesazhi që dua të përçoj është i vërtetë, real dhe këtë ua them edhe të rinjve në Shqipëri sepse janë ata që mbeten të zhgënjyer dhe e shohin të ardhmen e tyre jashtë Shqipërisë. U them, ky është momenti ku të rinjtë, të cilët janë më krijues, me aftësitë e duhura që i nevojiten Shqipërisë janë ata që mund të bëjnë të pamundurën që Shqipëria të bëhet shtet anëtar i BE-së,” tha Ambasadori Gonzato duke e pranuar se modeli i BE që po kërcënohet brenda Evropës, e bëri më të ndërgjegjshëm, më shumë se më parë në mënyrë që të bëjnë të pamundurën që i gjithë kontinenti që ndan këtë projekt, ka këto vlera të përbashkëta.

“Të bëhesh pjesë e BE-së nuk do të thotë që bëhesh pjesë e një projekti ekonomik apo tregu të vetëm, por është një përpjekje politike që bazohet te vlerat që ne i ndajmë me njëri-tjetrin. Verifikimi i realitetit do ndodhë edhe kur Shqipëria të bëhet anëtare.

Për herë të parë në Evropë ekziston rreziku i euroskepticizmit, jo te ata që nuk besojnë te projekti, por te ata që nuk po bëjnë të pamundurën për ato ideale, vlera që baballarët e BE-së kanë pasur. Nuk bëhet fjalë vetëm për zgjerimin e BE-së, por për plotësimin e BE-së,” tha Ambasadori i BE në Tiranë duke përsëritur refrenin e stërkonsumuar diplomatik se Shqipëria i takon BE-së, ndërsa të kesh një popullatë si e Shqipërisë që është entuziaste për integrimin në BE është një tregues që edhe qytetarët ecin me të njëjtin ritëm.

“Mendoj që ne do i mbyllim të gjithë grup-kapituj sivjet. Ka ngurrim e ankth në disa shtete të BE-së që shohin se krimi i organizuar po destabilizon jetët e tyre. Shqipëria po godet këto rrjete kriminale ndërkombëtare dhe ky është një sinjal i qartë dhe i fortë që kemi të bëjmë me një Shqipëri të re.

Një sfidë tjetër që unë shoh, është theksi gjithnjë e më i madh te puna e bërë. Nuk mjafton që ti të miratosh vetëm ligje,” tha Ambasadori i delegacionit të BE në Tiranë, Silvio Gonzato, duke përfunduar:

“Duhet të tregosh që këto ligje janë vënë në zbatim në mënyrë të saktë. Duhet një administratë publike profesionale, me njerëz që punojnë dhe rriten në karrierë në bazë të meritokracisë. Por, zbatimi varet dhe nga aktorë të tjerë.”

Ndryshe, Kryeministri Edi Rama si injorant diplomatik vetëm sa përsëriti se Shqipëria ndodhet më pranë se kurrë anëtarësimit në Bashkimin Evropian, të cilin e cilësoi objektiv historik për vendin, ndonëse sjelljet e kësaj qeverie po punojnë në kundërshtim me këtë objektiv, ndërsa vazhdoi të mburret me rolin e diplomacisë dhe sukseset e arritura ndërkombëtare, ku renditi dhe Samitin në Tiranë.