Diskriminimi i çamëve nga grekët dhe komunistët, Shpëtim Idrizi: “Fantazmat e kuqe” shfaqen edhe sot!
Shqiptarët e Çamërisë kanë vuajtur dy diskriminime, atë të shtetit grek dhe të dikatutës komuniste, tha Kryetari i PDIU-së, Shpëtim Idrizi, gjatë fjalës së tij në aktivitetin “Persekutimi i shqiptarëve të Çamërisë përgjatë regjimit komunist” ndërsa konstatoi se “Fantazmat e kuqe” vazhdojnë të shfaqen ende në shoqërinë shqiptare.
“Ka qenë një fill i kuq që ka shoqëruar çdo anëtarë të Shoqatës Çamëria, do të thosha dy të tilla. E para ishte persekutimi, shpërngulja, gjenocidi që ka ndodhur gjatë viteve 1913 -1950 nga programimi i shtetit grek dhe por edhe gjithë persekutimi në këtë fill të kuq komunist që na ka ndjekur dhe po na ndjek vazhdimisht. Që në fillesat e saj kemi vazhdimisht ndjerë tradhtinë, harresën, stigmatizimin që ka ndodhur mbi anëtarët e shoqatës Çamëria nga regjimi komunist i kohës.
Ishte pikërisht zona e Konispolit, që ka ndjerë persekutimet më të mëdha deri në vitet 1960 ku e gjithë elita çame u persekutuan. Jemi i vetmi vend që kemi vuajtur prej 50 vjetësh një regjim që ishte jo vetëm diktatorial por që i zhveshi shqiptarët nga gjithçka. I zhveshi nga besimi në zot, i zhveshi nga ekonomia, i zhveshi nga çdo lloje gjëje tjetër për të cilën ne ishim krenarë. Ne jemi sot i vetmi vend që kemi vuajtur 50 vjet nga regjimi më gjakatarë në të gjithë Evropën Lindore, ne sot si shoqëri nuk e kemi dënuar akoma atë sistem.”
Një shoqëri e cila nuk di të shkëputet nga kaluara e saj, tha Shpëtim Idrizi, nuk është e mundur ta njohë, ta dënojë dhe sigurisht që të ketë një të ardhme dhe rrugëtim të saj
“’Fantazmat e kuqe’ na shfaqen herë pas here dhe sot në shoqërinë shqiptare. Është e pamundur se si institucionet shqiptare nuk kanë një dokument relevant për dënimin e atij sistemi. Si shoqëri asnjëherë nuk jemi ndarë nga e kaluara, për të dënuar sistemin komunist, që ishte i vendosur në mënyrë jo të natyrshme sepse na vinte nga Rusia Sovjetike. E implementuar sigurisht për të mbajtur pushtetin një diktator si Enver Hoxha.”
Duke konstatuar se shumë pak flitet në shkollat shqiptare për regjimin diktatorial dhe komunizmin, Kryetari i PDIU-së, Shpëtim Idrizi, tha se shoqërisë shqiptare i mungon ligji për memorien historike të komunizmit ndërsa përfundoi:
“Ajo që i mungon shoqërisë shqiptare është ligji për memorien historike të komunizmit. Shumë pak flitet në shkollat shqiptare për regjimin diktatorial dhe komunizmin. Po kaq pak flitet për historinë e Çamërisë. Duhet t’i shpjegojmë fëmijëve tanë se çfarë ka qenë ai regjim diktatorial dhe çdo të thotë që filli i kuq ta shoqërojë akoma edhe sot shoqërinë shqiptare.”
Ndryshe, aktiviteti me temë: “Persekutimi i shqiptarëve të Çamërisë përgjatë regjimit komunist” u organizua nga Shoqata Patriotike Çamëria në bashkpunim me Institutin për Demokraci, Media dhe Komunikim, IDMC.
